ਧੋਖਾਧੜੀ ਨਾਲ ਅਮਰੀਕੀ ਨਾਗਰਿਕਤਾ ਲੈਣ ਵਾਲੇ ਪੰਜਾਬੀਆਂ ’ਤੇ ਸਰਕਾਰ ਨੇ ਸ਼ਿਕੰਜਾ ਕੱਸਿਆ

ਪੰਜਾਬੀਆਂ ਵਿੱਚ ਚਿੰਤਾ ਦੀ ਲਹਿਰ

ਨਿਊਯਾਰਕ – ਅਮਰੀਕਾ ਦੀ ਸੰਘੀ ਅਦਾਲਤ ਨੇ ਭਾਰਤੀ ਮੂਲ ਦੇ ਸਿੱਖ ਕੈਬ ਡਰਾਈਵਰ, ਗੁਰਮੀਤ ਸਿੰਘ (55 ਸਾਲ) ਦੀ ਅਮਰੀਕੀ ਨਾਗਰਿਕਤਾ ਨੂੰ ਰੱਦ ਕਰ ਦਿਤਾ ਹੈ। ਅਮਰੀਕੀ ਨਿਆਂ ਵਿਭਾਗ  ਮੁਤਾਬਕ ਇਹ ਕਾਰਵਾਈ ਧੋਖਾਧੜੀ ਤੇ ਅਪਰਾਧਕ ਪਿਛੋਕੜ ਛੁਪਾਉਣ ਦੇ ਕਾਰਨ ਕੀਤੀ ਗਈ ਹੈ।

ਗੁਰਮੀਤ ਸਿੰਘ ਨੇ ਸਾਲ 2011 ਵਿਚ ਨਿਊਯਾਰਕ ਵਿਖੇ ਇਕ ਮਹਿਲਾ ਸਵਾਰ ਨੂੰ ਅਗ਼ਵਾ ਕਰ ਕੇ ਚਾਕੂ ਦੀ ਨੋਕ ’ਤੇ ਉਸ ਨਾਲ ਜਬਰ-ਜਿਨਾਹ ਕੀਤਾ ਸੀ। ਉਸ ਨੇ ਨਾਗਰਿਕਤਾ ਲੈਣ ਦੀ ਪ੍ਰਕਿਰਿਆ ਦੌਰਾਨ ਇਸ ਗੰਭੀਰ ਅਪਰਾਧ ਨੂੰ ਲੁਕੋ ਕੇ ਰੱਖਿਆ ਅਤੇ 19 ਅਕਤੂਬਰ 2011 ਨੂੰ ਅਮਰੀਕੀ ਅਮਰੀਕੀ ਨਾਗਰਿਕਤਾ ਹਾਸਲ ਕਰ ਲਈ।  ਬਾਅਦ ਵਿਚ ਸਾਲ 2014 ਵਿਚ ਉਸ ਨੂੰ ਇਸ ਅਪਰਾਧ ਲਈ ਦੋਸ਼ੀ ਕਰਾਰ ਦਿੰਦਿਆਂ 20 ਸਾਲ ਦੀ ਕੈਦ ਦੀ ਸਜ਼ਾ ਸੁਣਾਈ ਗਈ ਸੀ। ਅਮਰੀਕੀ ਅਦਾਲਤ ਨੇ 26 ਅਗੱਸਤ 2026 ਨੂੰ ਫ਼ੈਸਲਾ ਸੁਣਾਉਂਦੇ ਹੋਏ ਉਸ ਦੀ ਨਾਗਰਿਕਤਾ ਰੱਦ ਕਰ ਦਿਤੀ ਅਤੇ ਉਸ ਨੂੰ ਅਪਣਾ ਪਾਸਪੋਰਟ ਤੇ ਸਰਟੀਫ਼ਿਕੇਟ ਜਮ੍ਹਾ ਕਰਵਾਉਣ ਦਾ ਹੁਕਮ ਦਿਤਾ।

ਅਮਰੀਕਾ ਦੇ ਅਟਾਰਨੀ ਜਨਰਲ ਟੌਡ ਬਲੈਂਚ ਨੇ ਸਾਫ਼ ਕੀਤਾ ਕਿ ਅਮਰੀਕੀ ਨਾਗਰਿਕਤਾ ਅਪਰਾਧੀਆਂ ਨੂੰ ਬਚਾਉਣ ਲਈ ਕੋਈ ਢਾਲ ਨਹੀਂ ਹੈ ਅਤੇ ਧੋਖੇ ਨਾਲ ਲਈ ਗਈ ਨਾਗਰਿਕਤਾ ਕਾਨੂੰਨੀ ਤੌਰ ’ਤੇ ਕਦੇ ਵੀ ਰੱਦ ਕੀਤੀ ਜਾ ਸਕਦੀ ਹੈ। ਸਜ਼ਾ ਪੂਰੀ ਹੋਣ ਤੋਂ ਬਾਅਦ ਉਸ ਨੂੰ ਡਿਪੋਰਟ ਭਾਵ ਭਾਰਤ ਵਾਪਸ ਭੇਜਣ ’ਤੇ ਵੀ ਵਿਚਾਰ ਕੀਤਾ ਜਾਵੇਗਾ। ਅਮਰੀਕੀ ਸਰਕਾਰ ਇਸੇ ਸਾਲ ਅਗੱਸਤ ਮਹੀਨੇ ਡੇਲਾਵੇਅਰ ਦੇ ਰਹਿਣ ਵਾਲੇ 65 ਸਾਲਾ ਨਰਿੰਦਰ ਸਿੰਘ ਦੀ ਨਾਗਰਿਕਤਾ ਰੱਦ ਕਰਨ ਲਈ ਅਦਾਲਤ ਵਿਚ ਕੇਸ ਦਰਜ ਕੀਤਾ ਹੈ।

ਉਸ ’ਤੇ ਦੋਸ਼ ਹੈ ਕਿ ਉਸ ਨੇ ਸਾਲ 1996 ਵਿਚ ਅਮਰੀਕਾ ਆਉਣ ਲਈ ਦੋ ਵੱਖ-ਵੱਖ ਫ਼ਰਜ਼ੀ ਪਛਾਣਾਂ ਦੀ ਵਰਤੋਂ ਕੀਤੀ ਸੀ ਅਤੇ ਇਸੇ ਧੋਖਾਧੜੀ ਨਾਲ 2008 ਵਿਚ ਨਾਗਰਿਕਤਾ ਹਾਸਲ ਕਰ ਲਈ। ਇਸ ਤੋਂ ਇਲਾਵਾ ਇਸ ਸਾਲ ਅਗੱਸਤ ਮਹੀਨੇ ਕੰਸਾਸ ਰਾਜ ਦੇ ਰਹਿਣ ਵਾਲੇ ਹਰਿੰਦਰ ਸਿੰਘ ਵਿਰੁਧ ਸਿਵਲ ਕੇਸ ਦਰਜ ਕੀਤਾ ਗਿਆ। ਜਾਂਚ ਵਿਚ ਸਾਹਮਣੇ ਆਇਆ ਕਿ ਉਹ 1991 ਵਿਚ ਪਹਿਲੀ ਵਾਰ ਰਸ਼ਪਾਲ ਸਿੰਘ ਦੇ ਨਾਂ ’ਤੇ ਅਮਰੀਕਾ ਆਇਆ ਸੀ ਅਤੇ 1995 ਵਿਚ ਉਸ ਨੂੰ ਡਿਪੋਰਟ (ਦੇਸ਼ ਨਿਕਾਲਾ) ਕਰਨ ਦਾ ਹੁਕਮ ਹੋਇਆ ਸੀ। ਉਸ ਨੇ ਇਹ ਪਿਛੋਕੜ ਛੁਪਾ ਕੇ ਨਵੇਂ ਨਾਂ ਹੇਠ 2008 ਵਿਚ ਨਾਗਰਿਕਤਾ ਲੈ ਲਈ ਸੀ। ਇਸ ਤੋਂ ਪਹਿਲਾਂ ਇਸ ਸਾਲ ਦੇ ਜੂਨ ਮਹੀਨੇ ਨਿਊ ਜਰਸੀ ਦੀ ਇਕ ਸਟਾਫਿੰਗ ਕੰਪਨੀ ਦੇ ਮਾਲਕ ਨੀਰਜ ਸ਼ਰਮਾ ਵਿਰੁਧ ਵੀ ਕਾਰਵਾਈ ਕੀਤੀ ਗਈ ਸੀ। ਉਸ ਨੇ 8-12 ਵੀਜ਼ਾ ਪ੍ਰਕਿਰਿਆ ਵਿਚ ਵੱਡੀ ਧੋਖਾਧੜੀ ਕੀਤੀ ਸੀ, ਫ਼ਰਜ਼ੀ ਦਸਤਾਵੇਜ਼ ਤਿਆਰ ਕੀਤੇ ਸਨ ਅਤੇ ਗਲੋਬਲ ਬੈਂਕਾਂ ਦੇ ਅਧਿਕਾਰੀਆਂ ਦੇ ਜਾਅਲੀ ਦਸਤਖ਼ਤ ਕੀਤੇ ਸਨ। ਇਸ ਅਪਰਾਧ ਨੂੰ ਲੁਕੋ ਕੇ ਨਾਗਰਿਕਤਾ ਲੈਣ ਕਾਰਨ ਉਸ ’ਤੇ ਕੇਸ ਚਲ ਰਿਹਾ ਹੈ।

ਜੂਨ 2026 ਵਿਚ ਹੀ ਜਸਵਿੰਦਰ ਸਿੰਘ ਨਾਮ ਦੇ ਵਿਅਕਤੀ ਵਿਰੁਧ ਓਰੇਗਨ ਦੀ ਅਦਾਲਤ ਵਿਚ ਨਾਗਰਿਕਤਾ ਰੱਦ ਕਰਨ ਦੀ ਸ਼ਿਕਾਇਤ ਦਰਜ ਕੀਤੀ ਗਈ। ਉਸ ਨੇ ਅਮਰੀਕਾ ਵਿਚ ਪੱਕੇ ਹੋਣ ਅਤੇ ਨਾਗਰਿਕਤਾ ਦੇ ਇੰਟਰਵਿਊ ਦੌਰਾਨ ਅਪਣੀ ਅਸਲ ਪਛਾਣ, ਜਨਮ ਤਰੀਕ ਅਤੇ ਅਮਰੀਕਾ ਵਿਚ ਦਾਖ਼ਲ ਹੋਣ ਦੀ ਤਰੀਕ ਬਾਰੇ ਝੂਠ ਬੋਲਿਆ ਸੀ। ਇਸ ਤੋਂ ਇਲਾਵਾ ਇਸ ਸਾਲ ਅਪ੍ਰੈਲ ਮਹੀਨੇ ਗੁਰਦੇਵ ਸਿੰਘ ਸੋਹਲ ਦੀ ਨਾਗਰਿਕਤਾ ਨੂੰ ਵੀ ਅਮਰੀਕੀ ਅਦਾਲਤ ਨੇ ਪੂਰੀ ਤਰ੍ਹਾਂ ਰੱਦ ਕਰ ਦਿਤਾ ਸੀ। ਉਸ ਨੇ ਦੇਸ਼ ਨਿਕਾਲੇ ਦੀ ਹਿਸਟਰੀ ਛੁਪਾ ਕੇ ਨਵੇਂ ਨਾਂ ’ਤੇ ਨਾਗਰਿਕਤਾ ਲਈ ਸੀ। ਅਮਰੀਕੀ ਅਧਿਕਾਰੀਆਂ ਨੇ ਪੁਰਾਣੇ ਉਂਗਲਾਂ ਦੇ ਨਿਸ਼ਾਨ ਨੂੰ ਡਿਜੀਟਾਈਜ਼ ਕਰ ਕੇ ਉਸ ਦੀ ਅਸਲ ਪਛਾਣ ਫੜੀ ਸੀ। ਗੁਰਦੇਵ ਸਿੰਘ ਸੋਹਲ ਜਿਸ ਨੂੰ ਦੇਵ ਸਿੰਘ ਤੇ ਬੂਟਾ ਸਿੰਘ ਸੰਧੂ ਦੇ ਨਾਂਅ ਨਾਲ ਵੀ ਜਾਣਿਆ ਜਾਂਦਾ ਹੈ ਉਸ ਵਿਰੁਧ ਸਾਲ 2025 ਵਿਚ ਨਾਗਰਿਕਤਾ ਰੱਦ ਕਰਨ ਲਈ ਸਿਵਲ ਸ਼ਿਕਾਇਤ ਦਰਜ ਕੀਤੀ ਗਈ ਸੀ। ਦਸਣਯੋਗ ਹੈ ਕਿ ਅਮਰੀਕੀ ਕਾਨੂੰਨ ਮੁਤਾਬਕ, ਇਕ ਵਾਰ ਨਾਗਰਿਕਤਾ ਮਿਲਣ ਦਾ ਮਤਲਬ ਇਹ ਨਹੀਂ ਕਿ ਉਹ ਕਦੇ ਰੱਦ ਨਹੀਂ ਹੋ ਸਕਦੀ।