ਸੜਕ ਹਾਦਸੇ ਵਿੱਚ ਪੰਜਾਬੀ ਜੋੜੇ ਦੀ ਮੌਤ ਲਈ ਜ਼ਿੰਮੇਵਾਰ ਪ੍ਰੋਫੈਸਰ ਨੇ ਗੁਨਾਹ ਕਬੂਲਿਆ

ਨਸ਼ੇ ਵਿੱਚ ਟੱਲੀ ਹੋਈ ਨੇ ਮਾਰੀ ਸੀ ਟੱਕਰ

ਸਕਾਟਲੈਂਡ – ਇੱਥੋਂ ਦੀ ਮਹਿਲਾ ਪ੍ਰੋਫੈਸਰ ਨੇ ਐਡਨਬਰ੍ਹਾ ਦੀ ਹਾਈਕੋਰਟ ਵਿੱਚ ਆਪਣੀ ਲਾਪਰਵਾਹੀ ਕਾਰਨ ਹੋਈਆਂ ਮੌਤਾਂ ਦਾ ਗੁਨਾਹ ਕਬੂਲ ਕਰ ਲਿਆ ਹੈ। ਸਕਾਟਲੈਂਡ ਵਿੱਚ ਬਿ੍ਰਟਿਸ਼ ਕਾਲਜ ਦੀ ਸਾਬਕਾ ਮਹਿਲਾ ਪ੍ਰੋਫੈਸਰ ਨੇ ਸ਼ਰਾਬ ਦੇ ਨਸ਼ੇ ਵਿੱਚ ਟੱਲੀ ਹੋ ਕੇ ਲਾਪਰਵਾਹੀ ਨਾਲ ਗੱਡੀ ਚਲਾਉਦਿਆਂ ਪੰਜਾਬੀ ਜੋੜੇ ਦੀ ਜਾਨ ਲੈ ਲਈ ਸੀ। ਇਸ ਭਿਆਨਕ ਹਾਦਸੇ ਵਿੱਚ ਪੰਜਾਬੀ ਜੋੜੇ ਦੀ ਦਰਦਨਾਕ ਮੌਤ ਹੋ ਗਈ। ਮਿ੍ਰਤਕਾਂ ਦੀ ਪਛਾਣ ਸਤਵੰਤ ਸਿੰਘ (64 ਸਾਲ) ਅਤੇ ਉਨ੍ਹਾਂ ਦੀ ਪਤਨੀ ਜਤਿੰਦਰ ਕੌਰ (48 ਸਾਲ) ਵਜੋਂ ਹੋਈ ਸੀ। ਇਹ ਭਿਆਨਕ ਹਾਦਸਾ ਪਿਛਲੇ ਸਾਲ 19 ਦਸੰਬਰ ਨੂੰ ਫਾਈਫ ਦੇ ਕਲੂਨੀ ਵਿਖੇ ਸੜਕ ’ਤੇ ਵਾਪਰਿਆ ਸੀ।

ਜਤਿੰਦਰ ਕੌਰ ਖੁਦ ਵੋਲਕਸਵੈਗਨ ਪੋਲੋ ਚਲਾ ਰਹੀ ਸੀ, ਜਿਸ ਦੀ ਹਾਦਸੇ ਵਾਲੀ ਥਾਂ ’ਤੇ ਹੀ ਮੌਤ ਹੋ ਗਈ, ਜਦੋਂ ਕਿ ਸਤਵੰਤ ਸਿੰਘ ਨੇ ਹਸਪਤਾਲ ਵਿੱਚ ਇਲਾਜ ਦੌਰਾਨ ਦੋ ਦਿਨਾਂ ਬਾਅਦ ਦਮ ਤੋੜ ਦਿੱਤਾ। ਇਹ ਪੰਜਾਬੀ ਜੋੜਾ ਕਿਰਕਕਾਲਡੀ ਸ਼ਹਿਰ ਵਿੱਚ ‘ਕੀਸਟੋਰ’ ਨਾਮ ਦੀ ਕਰਿਆਨੇ ਦੀ ਦੁਕਾਨ ਚਲਾਉਦਾ ਸੀ। ਹਾਦਸੇ ਦੇ ਸਮੇਂ ਗੱਡੀ ਵਿੱਚ ਇਸ ਜੋੜੇ ਦੇ ਨਾਲ ਉਨ੍ਹਾਂ ਦਾ 10 ਸਾਲਾ ਪੁੱਤਰ ਅਤੇ 19 ਸਾਲਾ ਧੀ ਪਰਵੀਤ ਵੀ ਸਵਾਰ ਸਨ। ਉਨ੍ਹਾਂ ਦਾ ਮਾਸੂਮ ਪੁੱਤਰ ਪਿਛਲੀ ਸੀਟ ’ਤੇ ਆਪਣੇ ਪਿਤਾ ਦੇ ਨਾਲ ਸੁੱਤਾ ਹੋਇਆ ਸੀ, ਜਿਸ ਨੂੰ ਇਸ ਹਾਦਸੇ ਵਿੱਚ ਗੰਭੀਰ ਸੱਟਾਂ ਲੱਗੀਆਂ, ਜਦ ਕਿ ਧੀ ਨੂੰ ਮਾਮੂਲੀ ਸੱਟਾਂ ਲੱਗੀਆਂ।

ਮੁਲਜ਼ਮ ਮਹਿਲਾ ਦੀ ਪਛਾਣ 33 ਸਾਲਾ ਸੋਫੀ ਹਾਇੰਡ ਵਜੋਂ ਹੋਈ ਹੈ, ਜੋ ਪਹਿਲਾਂ ਫਾਈਫ ਕਾਲਜ ਵਿੱਚ ਕੰਪਿੳੂਟਰ ਐਨੀਮੇਸ਼ਨ ਪੜ੍ਹਾਉਦੀ ਸੀ। ਹਾਦਸੇ ਵਾਲੇ ਦਿਨ ਕਾਲਜ ਦੇ ਆਖ਼ਰੀ ਦਿਨ ਕਿ੍ਰਸਮਸ ਲੰਚ ਅਤੇ ਪਾਰਟੀ ਦੌਰਾਨ ਸੋਫੀ ਨੇ ਭਾਰੀ ਮਾਤਰਾ ਵਿੱਚ ਸ਼ਰਾਬ ਪੀਤੀ ਹੋਈ ਸੀ। ਰਾਤ ਲਗਭਗ 10:30 ਵਜੇ ਉਹ ਨਸ਼ੇ ਵਿੱਚ ਟੱਲੀ ਹੋ ਕੇ ਆਪਣੀ ਨਿਸਾਨ ਕਾਸ਼ਕਾਈ ਗੱਡੀ ਚਲਾ ਕੇ ਘਰ ਲਈ ਨਿਕਲੀ। ਉਸਦੇ ਸਹਿਕਰਮੀਆਂ ਨੇ ਉਸ ਨੂੰ ਬਹੁਤ ਜ਼ਿਆਦਾ ਨਸ਼ੇ ਵਿੱਚ ਦੇਖਿਆ ਸੀ।

ਸੜਕ ’ਤੇ ਮੌਜੂਦ ਹੋਰਨਾਂ ਡਰਾਈਵਰਾਂ ਅਨੁਸਾਰ ਸੋਫੀ ਦੀ ਕਾਰ ਲਗਾਤਾਰ ਬਲਦ ਮੂਤਣੀ ਰਹੀ ਸੀ ਅਤੇ ਦੂਜੀ ਲੇਨ ਵਿੱਚ ਵੜ ਰਹੀ ਸੀ, ਜਿਸ ਤੋਂ ਬਾਅਦ ਉਸਨੇ ਪੰਜਾਬੀ ਜੋੜੇ ਦੀ ਗੱਡੀ ਨੂੰ ਸਿੱਧੀ ਭਿਆਨਕ ਟੱਕਰ ਮਾਰ ਦਿੱਤੀ। ਜਦੋਂ ਪੁਲਿਸ ਨੇ ਉਸ ਨੂੰ ਹਿਰਾਸਤ ਵਿੱਚ ਲਿਆ, ਤਾਂ ਉਸ ਤੋਂ ਸ਼ਰਾਬ ਦੀ ਭਾਰੀ ਬਦਬੂ ਆ ਰਹੀ ਸੀ ਅਤੇ ਉਸ ਨੂੰ ਇਹ ਵੀ ਅਹਿਸਾਸ ਨਹੀਂ ਸੀ ਕਿ ਉਹ ਇੰਨੇ ਵੱਡੇ ਹਾਦਸੇ ਦਾ ਹਿੱਸਾ ਬਣੀ ਹੈ। ਇਸ ਹਾਦਸੇ ਤੋਂ ਬਾਅਦ ਉਸ ਦੀ ਨੌਕਰੀ ਚਲਈ ਗਈ ਸੀ ਅਤੇ ਮਈ ਵਿੱਚ ਉਸ ’ਤੇ ਦੋਸ਼ ਆਇਦ ਕੀਤੇ ਗਏ ਸਨ। ਅਦਾਲਤ ਵਿੱਚ ਜੱਜ ਮਾਈਕਲ ਓ’ਗ੍ਰੇਡੀ ਕੇਸੀ ਨੇ ਇਸ ਅਪਰਾਧ ਨੂੰ ਬੇਹੱਦ ਗੰਭੀਰ ਦੱਸਿਆ। ਸੋਫੀ ਨੇ ਵਕੀਲ ਨੇ ਦੱਸਿਆ ਕਿ ਉਹ ਆਪਣੇ ਕੀਤੇ ’ਤੇ ਬੇਹੱਦ ਪਛਤਾਵਾ ਕਰ ਰਹੀ ਹੈ। ਅਦਾਲਤ ਨੇ ਮੁਲਜ਼ਮ ਸੋਫੀ ਹਾਇੰਡ ਨੂੰ ਨਿਆਂਇਕ ਹਿਰਾਸਤ ਵਿੱਚ ਜੇਲ੍ਹ ਭੇਜ ਦਿੱਤਾ ਹੈ ਅਤੇ ਇਸ ਮਾਮਲੇ ਦੀ ਅਗਲੀ ਸੁਣਵਾਈ ਅਕਤੂਬਰ ਵਿੱਚ ਹੋਵੇਗੀ।