ਵਿਕਰਮ ਹੱਥੋਂ ਕਤਲ ਹੋਏ ਗੋਰੇ ਵਿਦਿਆਰਥੀ ਦੇ ਕਤਲ ਦੀ ਮੁੜ ਜਾਂਚ ਹੋਵੇਗੀ

ਪੁਲਿਸ ’ਤੇ ਲਾਪ੍ਰਵਾਹੀ ਦੇ ਦੋਸ਼

ਸਾੳੂਥੈਂਪਟਨ – ਯੂ.ਕੇ ਸਰਕਾਰ ਨੇ ਇੱਕ ਵਿਦਿਆਰਥੀ ਦੇ ਹਾਈ ਪ੍ਰੋਫਾਈਲ ਕਤਲ ਦੀ ਸੁਤੰਤਰ ਜਾਂਚ ਦਾ ਐਲਾਨ ਕੀਤਾ ਹੈ, ਜਿਸਨੂੰ ਪੁਲਿਸ ਨੇ ਇੱਕ ਬਿ੍ਰਟਿਸ਼ ਸਿੱਖ ਦੁਆਰਾ ਚਾਕੂ ਮਾਰੇ ਜਾਣ ਤੋਂ ਬਾਅਦ ਮਰਨ ਵੇਲੇ ਹੱਥਕੜੀ ਲਗਾਈ ਸੀ। ਯੂ.ਕੇ ਦੀ ਹੋਮ ਸੈਕਟਰੀ ਸ਼ਬਾਨਾ ਮਹਿਮੂਦ ਨੇ 18 ਸਾਲਾ ਵਿਦਿਆਰਥੀ ਹੈਨਰੀ ਨੋਵਾਕ ਦੇ ਕਤਲ ਨੂੰ ਰੋਕਣ ਵਿੱਚ ਹੋਈਆਂ ਸੰਭਾਵੀ ਲਾਪ੍ਰਵਾਹੀਆਂ ਦੀ ਜਾਂਚ ਲਈ ਇੱਕ ਉੱਚ ਪੱਧਰੀ ਸਮੀਖਿਆ ਸ਼ੁਰੂ ਕਰਨ ਦਾ ਐਲਾਨ ਕੀਤਾ ਹੈ। ਇਹ ਜਾਂਚ ਇਸ ਗੱਲ ਦੀ ਸਮੀਖਿਆ ਕਰੇਗੀ ਕਿ ਕੀ ਦੋਸ਼ੀ ਵਿਕਰਮ ਦਿਗਵਾ ਦੇ ਹਿੰਸਕ ਇਤਿਹਾਸ ਅਤੇ ਚੇਤਾਵਨੀਆਂ ਨੂੰ ਅਣਗੌਲਿਆਂ ਕਰਨ ਤੋਂ ਬਾਅਦ ਇਸ ਹੱਤਿਆ ਨੂੰ ਰੋਕਣ ਦੇ ਮੌਕੇ ਗੁਆ ਦਿੱਤੇ ਗਏ ਸਨ। ਇਸ ਸਮੀਖਿਆ ਦੀ ਅਗਵਾਈ ਬਿ੍ਰਟੇਨ ਦੇ ਸਾਬਕਾ ਲਾਰਡ ਚਾਂਸਲਰ ਐਲੇਕਸ ਚਾਕ ਕੇ.ਸੀ. ਕਰਨਗੇ।

ਨੋਵਾਕ ਨੂੰ ਮੈਡੀਕਲ ਮਦੱਦ ਦੇਣ ਦੀ ਥਾਂ ਹੱਥਕੜੀਆਂ ਲੱਗਾ ਦਿੱਤੀਆਂ। ਪੁਲਿਸ ਦੇ ਬਾਡੀ-ਕੈਮਰੇ ਦੀ ਫੁਟੇਜ਼ ਵਿੱਚ ਨੋਵਾਕ ਨੂੰ ਵਾਰ-ਵਾਰ ‘‘ਮੈਨੂੰ ਚਾਕੂ ਮਾਰਿਆ ਗਿਆ ਹੈ’’ ਕਹਿੰਦੇ ਸੁਣਿਆ ਗਿਆ, ਜਿਸ ’ਤੇ ਇੱਕ ਪੁਲਿਸ ਅਧਿਕਾਰੀ ਨੇ ਜਵਾਬ ਦਿੱਤਾ, ‘‘ਮੈਨੂੰ ਨਹੀਂ ਲੱਗਦਾ, ਦੋਸਤ’’। ਹਸਪਤਾਲ ਲਿਜਾਣ ਤੋਂ ਪਹਿਲਾਂ ਹੀ ਖੂਨ ਵਹਿਣ ਕਾਰਨ ਨੋਵਾਕ ਦੀ ਮੌਤ ਹੋ ਗਈ।

ਜਾਂਚ ਵਿੱਚ ਸਾਹਮਣੇ ਆਇਆ ਹੈ ਕਿ 23 ਸਾਲਾ ਦੋਸ਼ੀ ਵਿਕਰਮ ਦਿਗਵਾ ਦਾ ਪਹਿਲਾਂ ਵੀ ਧਮਕਾਉਣ ਵਾਲਾ ਰਵੱਈਆ ਰਿਹਾ ਸੀ ਅਤੇ ਉਸ ਨੂੰ ਹਥਿਆਰਾਂ ਦਾ ਜਨੂੰਨ ਸੀ। ਹੱਤਿਆ ਤੋਂ ਕੁਝ ਮਹੀਨੇ ਪਹਿਲਾਂ ਉਸ ਨੇ ਸਾੳੂਥੈਂਪਟਨ ਦੇ ਇੱਕ ਗੁਰਦੁਆਰੇ ਵਿੱਚ ਵੀ ਨੌਜਵਾਨਾਂ ਨੂੰ ਧਮਕਾਇਆ ਸੀ। ਇਸ ਤੋਂ ਇਲਾਵਾ ਅਕਤੂਬਰ 2022 ਵਿੱਚ ਉਸ ਨੂੰ ਆਪਣੇ ਘਰ ਦੇ ਪਿਛਲੇ ਵਿਹੜੇ ਵਿੱਚ ਏਅਰਗਨ ਚਲਾਉਦੇ ਦੇਖਿਆ ਗਿਆ ਸੀ, ਜਿਸ ਦੀ ਗੁਆਂਢੀਆਂ ਨੇ ਪੁਲਿਸ ਨੂੰ ਸ਼ਿਕਾਇਤ ਵੀ ਕੀਤੀ ਸੀ। ਹਮਲੇ ਵਾਲੀ ਰਾਤ ਦਿਗਵਾ ਕੋਲ ਦੋ ਚਾਕੂ ਸਨ, ਜਿਨ੍ਹਾਂ ਵਿੱਚ ਇੱਕ ਸਿਰੀ ਸਾਹਿਬ ਵੀ ਸ਼ਾਮਿਲ ਸੀ।

ਵਿਕਰਮ ਦਿਗਵਾ ਨੂੰ ਅਦਾਲਤ ਨੇ ਉਮਰਕੈਦ ਦੀ ਸਜ਼ਾ ਸੁਣਾਈ ਹੈ, ਜਿਸ ਵਿੱਚ ਘੱਟੋ-ਘੱਟ 21 ਸਾਲ ਦੀ ਜੇਲ੍ਹ ਤੈਅ ਕੀਤੀ ਗਈ ਹੈ। ਉਹ 5 ਨਵੰਬਰ ਨੂੰ ਅਪੀਲ ਅਦਾਲਤ ਵਿੱਚ ਆਪਣੀ ਸਜ਼ਾ ਦੀ ਮਿਆਦ ਵਿਰੁੱਧ ਅਪੀਲ ਕਰਨ ਜਾ ਰਿਹਾ ਹੈ। ਦੋਸ਼ੀ ਦੀ ਮਾਂ ਕਿਰਨ ਕੌਰ ਨੂੰ ਵੀ ਅਪਰਾਧੀ ਦੀ ਮਦੱਦ ਕਰਨ ਦੇ ਦੋਸ਼ ਹੇਠ 3 ਸਾਲ ਦੀ ਜੇਲ੍ਹ ਦੀ ਸਜ਼ਾ ਸੁਣਾਈ ਗਈ ਹੈ, ਕਿਉਕਿ ਉਸ ਨੇ ਆਪਣੇ ਪੁੱਤਰ ਦੁਆਰਾ ਵਰਤਿਆ ਗਿਆ ਚਾਕੂ ਲੁਕਾਉਣ ਦੀ ਕੋਸ਼ਿਸ ਕੀਤੀ ਸੀ। ਪੁਲਿਸ ਨੂੰ ਉਨ੍ਹਾਂ ਦੇ ਘਰੋਂ 20 ਤੋਂ ਵੱਧ ਹਥਿਆਰ ਬਰਾਮਦ ਹੋਏ ਸਨ।

‘ਇੰਡੀਪੈਂਡੈਂਟ ਆਫ਼ਿਸ ਫ਼ਾਰ ਪੁਲਿਸ ਕੰਡਕਟ’ ਦੁਆਰਾ ਮੌਕੇ ’ਤੇ ਪਹੁੰਚੇ ਦੋ ਪੁਲਿਸ ਅਧਿਕਾਰੀਆਂ ਵਿਰੁੱਧ ਗੰਭੀਰ ਲਾਪ੍ਰਵਾਹੀ ਦੀ ਜਾਂਚ ਕੀਤੀ ਜਾ ਰਹੀ ਹੈ ਕਿ ਉਨ੍ਹਾਂ ਨੇ ਮੁੱਢਲੀ ਸਹਾਇਤਾ ਦੇਣ ਦੀ ਥਾਂ ਵਿਦਿਆਰਥੀ ਨੂੰ ਗਿ੍ਰਫ਼ਤਾਰ ਕਿਉ ਕੀਤਾ ? ਨੋਵਾਕ ਦੇ ਪਰਿਵਾਰ ਨੇ ਇਸ ਅਜ਼ਾਦ ਸਮੀਖਿਆ ਦਾ ਸਵਾਗਤ ਕਰਦਿਆਂ ਇਸ ਨੂੰ ਇਨਸਾਫ਼ ਦੀ ਲੜਾਈ ਵਿੱਚ ਇੱਕ ‘‘ਮਹੱਤਵਪੂਰਨ ਮੋੜ’’ ਦੱਸਿਆ ਹੈ। ਪਰਿਵਾਰ ਨੇ ਕਿਹਾ ਕਿ ਉਨ੍ਹਾਂ ਨੇ ਹੈਨਰੀ ਨੂੰ ਗੁਆਉਣ ਦੇ ਅਸਹਿ ਦੁੱਖ ਦੇ ਨਾਲ-ਨਾਲ ਸੱਚਾਈ ਸਾਹਮਣੇ ਲਿਆਉਣ ਲਈ ਅਣਥੱਕ ਲੜਾਈ ਲੜੀ ਹੈ। ਉਨ੍ਹਾਂ ਨੂੰ ਉਮੀਦ ਹੈ ਕਿ ਇਹ ਜਾਂਚ ਪੂਰੀ ਸੱਚਾਈ ਸਾਹਮਣੇ ਲਿਆਵੇਗੀ ਤਾਂ ਜੋ ਕਿਸੇ ਹੋਰ ਪਰਿਵਾਰ ਨੂੰ ਅਜਿਹੇ ਦੁੱਖ ਵਿੱਚੋਂ ਨਾ ਲੰਘਣਾ ਪਵੇ।