ਪੰਜਾਬ ਜਾਇਦਾਦ ਵੇਚਣ ਗਿਆ ਐਨ.ਆਰ.ਆਈ ਲਾਪਤਾ ਹੋਇਆ

ਪੁਲਿਸ ਵਲੋਂ ਭਰਾ ’ਤੇ ਸ਼ੱਕ

ਪੰਜਾਬ – ਮੈਲਬੋਰਨ ਦੇ ਰਹਿਣ ਵਾਲੇ 66 ਸਾਲਾ ਆਸਟਰੇਲੀਆਈ ਨਾਗਰਿਕ ਅਤੇ ਹਾਈ ਸਕੂਲ ਅਧਿਆਪਕ ਸੁਨੀਲ ਸ਼ਰਮਾ ਪੰਜਾਬ ਵਿਚ ਭੇਦਭਰੀ ਹਾਲਤ ਵਿਚ ਲਾਪਤਾ ਹੋ ਗਿਆ। ਜਾਣਕਾਰੀ ਅਨੁਸਾਰ ਸੁਨੀਲ ਸ਼ਰਮਾ ਨਾਲ ਆਖ਼ਰੀ ਵਾਰ 22 ਮਈ ਨੂੰ ਸੰਪਰਕ ਹੋਇਆ ਸੀ, ਜਦੋਂ ਉਹ ਅਪਣੀ ਸੇਵਾਮੁਕਤੀ ਤੋਂ ਪਹਿਲਾਂ ਦੀ ਇਕ ਜਾਇਦਾਦ ਵੇਚਣ ਦੀ ਤਿਆਰੀ ਦੇ ਸਿਲਸਿਲੇ ਵਿਚ ਅੰਮ੍ਰਿਤਸਰ ਗਿਆ ਸੀ।

ਡਾਇਮੰਡ ਵੈਲੀ ਕਾਲਜ ਵਿਚ ਗਣਿਤ ਦੇ ਅਧਿਆਪਕ ਸ਼ਰਮਾ, ਫ਼ਤਿਹਗੜ੍ਹ ਚੂੜੀਆਂ ਰੋਡ ਸਥਿਤ ਆਸ਼ੀਆਨਾ ਐਸਟੇਟ ਵਿਚ ਅਪਣੀ ਜਾਇਦਾਦ ਦੇ ਨਵੀਨੀਕਰਨ ਅਤੇ ਰੰਗ-ਰੋਗਨ ਦੇ ਕੰਮ ਦੀ ਦੇਖਭਾਲ ਲਈ ਪੰਜਾਬ ਗਏ ਹੋਏ ਸਨ। ਉਨ੍ਹਾਂ ਦੀ ਬੇਟੀ ਸੁਰਭੀ ਸ਼ਰਮਾ ਅਨੁਸਾਰ ਯਾਤਰਾ ਦੌਰਾਨ ਪਰਵਾਰ ਉਨ੍ਹਾਂ ਨਾਲ ਲਗਾਤਾਰ ਸੰਪਰਕ ਵਿਚ ਸੀ। ਉਨ੍ਹਾਂ ਨੇ 21 ਮਈ ਨੂੰ ਅਤੇ ਫਿਰ 22 ਮਈ ਦੀ ਸਵੇਰ ਨੂੰ ਅਪਣੇ ਬੱਚਿਆਂ ਨਾਲ ਗੱਲ ਕੀਤੀ ਸੀ। ਅਗਲੇ ਦਿਨ ਤਕ ਉਨ੍ਹਾਂ ਦਾ ਮੋਬਾਈਲ ਫ਼ੋਨ ਬੰਦ ਹੋ ਚੁੱਕਾ ਸੀ। ਮੋਹਾਲੀ ਤੋਂ ਅੰਮ੍ਰਿਤਸਰ ਜਾ ਰਹੇ ਸ਼ਰਮਾ ਅਤੇ ਉਨ੍ਹਾਂ ਦੀ ਕਾਰ ਦੋਵਾਂ ਦੇ ਲਾਪਤਾ ਹੋਣ ਤੋਂ ਬਾਅਦ ਪਰਵਾਰ ਚਿੰਤਤ ਹੋ ਗਿਆ। ਬਾਅਦ ਵਿਚ ਜਦੋਂ ਉਨ੍ਹਾਂ ਦੇ ਦੋਸਤਾਂ ਨੇ ਘਰ ਦੀ ਜਾਂਚ ਕੀਤੀ ਤਾਂ ਗੇਟ ਬੰਦ ਮਿਲੇ ਅਤੇ ਨਾ ਤਾਂ ਸ਼ਰਮਾ ਦਾ ਕੋਈ ਸੁਰਾਗ ਮਿਲਿਆ ਅਤੇ ਨਾ ਹੀ ਉਨ੍ਹਾਂ ਦੀ ਗੱਡੀ ਦਾ।

ਸੁਰਭੀ ਨੇ ਦਸਿਆ ਕਿ ਸਥਾਨਕ ਅਧਿਕਾਰੀ ਉਨ੍ਹਾਂ ਦੇ ਪਿਤਾ ਦੇ ਭਰਾ ਦਾ ਵੀ ਪਤਾ ਲਗਾਉਣ ਦੀ ਕੋਸ਼ਿਸ਼ ਕਰ ਰਹੇ ਹਨ ਅਤੇ ਪੁਲਿਸ ਨੂੰ ਸੁਸ਼ੀਲ ਕੁਮਾਰ ਦੇ ਭਰਾ ’ਤੇ ਸ਼ੱਕ ਹੈ, ਜਿਸ ਨੂੰ  ਆਖ਼ਰੀ ਵਾਰ ਉਸੇ ਜਾਇਦਾਦ ’ਤੇ ਦੇਖਿਆ ਗਿਆ ਸੀ, ਜਿਸ ਤੋਂ ਬਾਅਦ ਉਸ ਨਾਲ ਵੀ ਸੰਪਰਕ ਨਹੀਂ ਹੋ ਪਾ ਰਿਹਾ ਹੈ। ਪੁਲਿਸ ਇਕ ਸੰਭਾਵਿਤ ਖ਼ਰੀਦਦਾਰ ਤੋਂ ਵੀ ਪੁੱਛਗਿੱਛ ਕਰੇਗੀ, ਜਿਸ ਨੇ ਕਥਿਤ ਤੌਰ ’ਤੇ ਉਸੇ ਸਮੇਂ ਦੇ ਆਸ-ਪਾਸ ਜਾਇਦਾਦ ਦਾ ਦੌਰਾ ਕੀਤਾ ਸੀ।