ਕੈਲੀਫੋਰਨੀਆ ਵਿੱਚ ਭਾਰਤੀ ਦੌੜਾਕ ਨੇ 5 ਹਜਾਰ ਮੀਟਰ ਦੌੜ ਵਿੱਚ ਜਿੱਤਿਆ ਚਾਂਦੀ ਦਾ ਤਮਗਾ

ਆਪਣਾ ਹੀ ਰਾਸ਼ਟਰੀ ਰਿਕਾਰਡ ਤੋੜਿਆ

ਸੈਕਰਾਮੈਂਟੋ, ਕੈਲੀਫੋਰਨੀਆ (ਹੁਸਨ ਲੜੋਆ ਬੰਗਾ)- ਭਾਰਤੀ ਦੌੜਾਕ ਗੁਲਵੀਰ ਸਿੰਘ ਨੇ ਕੈਲੀਫੋਰਨੀਆ ਵਿੱਚ ਲਾਸ ਏਂਜਲਸ ਟਰੈਕ ਫੈਸਟ ਮੁਕਾਬਲੇ ਵਿੱਚ 5000 ਮੀਟਰ ਦੌੜ ਵਿੱਚ ਆਪਣਾ ਹੀ ਭਾਰਤੀ ਰਾਸ਼ਟਰੀ ਰਿਕਾਰਡ ਤੋੜ ਕੇ ਚਾਂਦੀ ਦਾ ਤਮਗਾ ਜਿੱਤਿਆ ਹੈ।

ਭਾਰਤ ਦੀ ਪ੍ਰਤੀਨਿੱਧਤਾ ਕਰਦਿਆਂ ਉਸ ਨੇ ਦੌੜ 13.03.93 ਮਿੰਟਾਂ ਵਿਚ ਪੂਰੀ ਕੀਤੀ। ਪਹਿਲੇ ਸਥਾਨ ‘ਤੇ ਐਰੀਟਰੀਨ  ਦੌੜਾਕ ਹੈਬਟਮ ਸੈਮੂਏਲ ਰਿਹਾ ਜਿਸ ਨੇ 12.57.22 ਮਿੰਟਾਂ ਵਿਚ ਦੌੜ ਪੂਰੀ ਕਰਕੇ ਸੋਨੇ ਦਾ ਤਮਗ ਜਿੱਤਿਆ। ਗੁਲਵੀਰ ਸਿੰਘ ਦਾ ਪਹਿਲਾ ਰਾਸ਼ਟਰੀ ਰਿਕਾਰਡ 13.11.82 ਮਿੰਟ ਹੈ ਜੋ ਉਸ ਨੇ ਸਤੰਬਰ 2024 ਵਿਚ ਜਪਾਨ ਵਿੱਚ ਕਾਇਮ ਕੀਤਾ ਸੀ।

ਫੌਜ ਵਿਚ ਨੌਕਰੀ ਕਰਦੇ ਗੁਲਵੀਰ ਸਿੰਘ ਦੀ ਇੰਡੀਅਨ ਆਰਮੀ ਸਪੋਰਟਸ ਐਂਡ ਐਡਵੈਂਚਰ ਵਿੰਗ ਨੇ ਸੋਸ਼ਲ ਮੀਡੀਆ ਐਕਸ ਉਪਰ ਉਸ ਦੀ ਕਾਰਗੁਜਾਰੀ ਦੀ ਪ੍ਰਸੰਸਾ ਕੀਤੀ ਹੈ। ਗੁਲਵੀਰ ਸਿੰਘ ਦਾ 3000 ਮੀਟਰ ਤੇ 10000 ਮੀਟਰ ਵਿੱਚ  ਵੀ ਰਾਸ਼ਟਰੀ ਰਿਕਾਰਡ ਹੈ। ਏਸ਼ੀਅਨ ਅਥਲੈਟਿਕਸ ਚੈਂਪੀਅਨਸ਼ਿੱਪ 2025 ਵਿੱਚ ਉਸ ਨੇ 5 ਹਜਾਰ ਤੇ 10 ਹਜਾਰ ਮੀਟਰ ਵਿੱਚ ਸੋਨ ਤਮਗਾ ਜਿੱਤਿਆ ਸੀ।