ਪੰਜਾਬੀ ਦੀ ਸ਼ਮੂਲੀਅਤ ਵਾਲੇ ਨਸ਼ਾ ਤਸਕਰ ਗ੍ਰੋਹ ਨੂੰ ਕਰੀਬ 45 ਸਾਲ ਜੇਲ੍ਹ ਦੀ ਸਜ਼ਾ

ਸ਼ੋਸ਼ਲ ਮੀਡੀਆ ’ਤੇ ਕੀਤੇ ਦਿਖਾਵਿਆਂ ਨੇ ਫਸਾਏ

ਗਲਾਸਗੋ (ਮਨਦੀਪ ਖੁਰਮੀ ਹਿੰਮਤਪੁਰਾ) – ਨਸ਼ਿਆਂ ਦੀ ਸਪਲਾਈ ਤੋਂ ਹੋਣ ਵਾਲੀ ਕਮਾਈ ਦਾ ਸੋਸ਼ਲ ਮੀਡੀਆ ’ਤੇ ਖੁੱਲ੍ਹੇਆਮ ਦਿਖਾਵਾ ਕਰਨ ਵਾਲੇ ਗਲਾਸਗੋ ਦੇ ਛੇ ਨਸ਼ਾ ਤਸਕਰਾਂ ਨੂੰ ਕੁੱਲ ਕਰੀਬ 45 ਸਾਲ ਦੀ ਕੈਦ ਦੀ ਸਜ਼ਾ ਸੁਣਾਈ ਗਈ ਹੈ। ਗਲਾਸਗੋ ਵਸਦੇ ਪੰਜਾਬੀ ਭਾਈਚਾਰੇ ਲਈ ਨਮੋਸ਼ੀ ਵਾਲੀ ਗੱਲ ਹੈ ਕਿ ਇਨ੍ਹਾਂ ਨਸ਼ਾ ਤਸਕਰਾਂ ਵਿੱਚ ਇੱਕ ਪੰਜਾਬੀ ਨੌਜਵਾਨ ਅਜੈਦੀਪ ਸਿੰਘ ਦਾ ਨਾਂਅ ਵੀ ਸਾਹਮਣੇ ਆਇਆ ਹੈ। ਇਨ੍ਹਾਂ ਤਸਕਰਾਂ ਵਿੱਚੋਂ ਇੱਕ ਅਜ਼ਾਦ ਹੁਸੈਨ ਨੂੰ ਗਲਾਸਗੋ ਦੀ ਹਾਈ ਕੋਰਟ ਵਿੱਚ ਮੁਕੱਦਮੇ ਤੋਂ ਬਾਅਦ ਦੋਸ਼ੀ ਕਰਾਰ ਦਿੱਤੇ ਜਾਣ ਬਾਅਦ ਚਾਰ ਸਾਲ ਕੈਦ ਦੀ ਸਜ਼ਾ ਸੁਣਾਈ ਗਈ। ਇਸ ਤੋਂ ਪਹਿਲਾਂ ਰਿਆਨ ਕਾਰਵਿਲ, ਅਦੀਲ ਇਕਬਾਲ, ਸਾਦ ਕਯੂਮ, ਅਜੈਦੀਪ ਸਿੰਘ ਅਤੇ ਮੁਹੰਮਦ ਹਨੀਫ ਨੂੰ ਵੀ ਦੋਸ਼ੀ ਕਰਾਰ ਦੇ ਕੇ ਵੱਖ-ਵੱਖ ਸੁਣਵਾਈਆਂ ਦੌਰਾਨ ਸਜ਼ਾਵਾਂ ਸੁਣਾਈਆਂ ਜਾ ਚੁੱਕੀਆ ਹਨ।

ਇਹ ਗਿਰੋਹ ਗਲਾਸਗੋ ਵਿੱਚ ਕੋਕੀਨ, ਐਕਸਟਸੀ, ਐਟੀਜ਼ੋਲਮ ਅਤੇ ਕੇਟਾਮਾਈਨ ਵਰਗੇ ਨਸ਼ੀਲੇ ਪਦਾਰਥਾਂ ਦੀ ਸਪਲਾਈ ਕਰਕੇ ਹੋਣ ਵਾਲੀ ਕਮਾਈ ਦਾ ਸੋਸ਼ਲ ਮੀਡੀਆ ’ਤੇ ਫੁਕਰੀ ਮਾਰਦੇ ਸਨ। ਨਸ਼ਿਆਂ ਦੀ ਤਸਕਰੀ ਤੋਂ ਕਮਾਏ ਸੈਂਕੜੇ ਹਜ਼ਾਰ ਪੌਂਡ ਉਨ੍ਹਾਂ ਨੇ ਮਹਿੰਗੀਆਂ ਲਗਜ਼ਰੀ ਕਾਰਾਂ ਖਰੀਦਣ ’ਤੇ ਖਰਚ ਕੀਤੇ, ਜਿਨ੍ਹਾਂ ਵਿੱਚ ਮੈਕਲਾਰੇਨ ਵਰਗੀ ਸੁਪਰਕਾਰ ਵੀ ਸ਼ਾਮਿਲ ਸੀ। ਇਸ ਤੋਂ ਇਲਾਵਾ ਉਨ੍ਹਾਂ ਨੇ ਆਪਣੀ ਗ਼ੈਰ-ਕਾਨੂੰਨੀ ਕਮਾਈ ਨਾਲ ਮਹਿੰਗੀਆਂ ਘੜੀਆਂ, ਗਹਿਣੇ ਅਤੇ ਸੰਯੁਕਤ ਅਰਬ ਅਮੀਰਾਤ (ਯੂ.ਏ.ਈ.) ਵਿੱਚ ਆਲੀਸ਼ਾਨ ਰਿਹਾਇਸ਼ਾਂ ’ਤੇ ਵੀ ਖਰਚ ਕੀਤਾ। ਇਸ ਗਿਰੋਹ ਦੀਆਂ ਗ਼ੈਰ-ਕਾਨੂੰਨੀ ਸਰਗਰਮੀਆਂ ਦਾ ਪਰਦਾਫਾਸ਼ ਸਾਲ 2022 ਦੇ ਸ਼ੁਰੂ ਵਿੱਚ ‘ਆਪ੍ਰੇਸ਼ਨ ਅਰੈਕਨੋਇਡਾ’ ਤਹਿਤ ਹੋਇਆ ਸੀ। ਇਸ ਮਾਮਲੇ ਦੀ ਜਾਂਚ ਗ੍ਰੇਟਰ ਗਲਾਸਗੋ ਦੇ ਜਾਸੂਸ ਪੁਲਿਸ ਅਧਿਕਾਰੀਆਂ ਦੀ ਇੱੱਕ ਵਿਸ਼ੇਸ਼ ਟੀਮ ਵੱਲੋਂ ਕੀਤੀ ਗਈ ਸੀ।