ਲੰਡਨ ਦੇ ਹੰਸਲੋ ਇਲਾਕੇ ਵਿੱਚ ਪੰਜਾਬਣ ਮਿ੍ਰਤਕ ਪਾਈ ਗਈ

ਪੁਲਿਸ ਵਲੋਂ ਕਥਿੱਤ ਪੰਜਾਬੀ ਗਿ੍ਰਫ਼ਤਾਰ

ਲੰਡਨ – ਇੱਥੇ ਪੰਜਾਬੀ ਮੂਲ ਦੀ 26 ਸਾਲਾ ਔਰਤ ਦੀ ਗੋਲੀ ਲੱਗਣ ਕਾਰਨ ਮੌਤ ਹੋ ਗਈ। ਪਿਛਲੇ ਹਫ਼ਤੇ ਲੰਡਨ ਦੇ ਇੱਕ ਘਰ ਵਿੱਚ ਉਸਦੀ ਲਾਸ਼ ਮਿਲੀ ਸੀ, ਜਿਸ ’ਤੇ ਗੋਲੀਆਂ ਦੇ ਜ਼ਖ਼ਮ ਸਨ। ਇਸ ਮਾਮਲੇ ਵਿੱਚ 31 ਸਾਲਾ ਇੱਕ ਵਿਅਕਤੀ ਨੂੰ ਦੋਸ਼ੀ ਠਹਿਰਾਉਦੇ ਹੋਏ ਸੋਮਵਾਰ ਨੂੰ ਅਦਾਲਤ ਵਿੱਚ ਪੇਸ਼ ਕੀਤਾ ਗਿਆ।

ਮੈਟਰੋਪੋਲੀਨ ਪੁਲਿਸ ਨੇ ਦੱਸਿਆ ਕਿ ਹੰਸਲੋ ਦੇ ਚਰਟਸੀ ਰੋਡ ’ਤੇ ਇੱਕ ‘ਭਲਾਈ ਜਾਂਚ’ ਦੌਰਾਨ ਔਰਤ ਮਿਲੀ ਸੀ, ਜਿਸ ਦੀ ਪਛਾਣ ਨਵਨੀਤ ਕੌਰ ਵਜੋਂ ਹੋਈ ਹੈ।
ਭਾਰਤੀ ਮੂਲ ਦੇ ਹੀ ਰਜਤ ਜਸਵੈਲ ਨੂੰ ਘਟਨਾ ਤੋਂ ਤੁਰੰਤ ਬਾਅਦ ਗਿ੍ਰਫ਼ਤਾਰ ਕਰ ਲਿਆ ਗਿਆ ਸੀ। ਉਸ ’ਤੇ ਕਤਲ ਅਤੇ ਜਾਨ ਨੂੰ ਖ਼ਤਰੇ ਵਿੱਚ ਪਾਉਣ ਦੇ ਇਰਾਦੇ ਨਾਲ ਹਥਿਆਰ ਰੱਖਣ ਦੇ ਦੋਸ਼ ਲਗਾਏ ਗਏ ਹਨ ਅਤੇ ਉਸਨੂੰ ਹੈਂਡਨ ਮੈਜਿਸਟ੍ਰੇਟ ਅਦਾਲਤ ਵਿੱਚ ਪੇਸ਼ ਕੀਤਾ ਗਿਆ

ਪੁਲਿਸ ਨੇ ਜਾਂਚ ਵਿੱਚ ਮਦੱਦ ਲਈ ਲੋਕਾਂ ਤੋਂ ਜਾਣਕਾਰੀ ਮੰਗੀ ਹੈ, ਖਾਸ ਤੌਰ ’ਤੇ ਉਸ ਇਲਾਕੇ ਦੇ ਘਰਾਂ ਦੇ ਦਰਵਾਜ਼ਿਆਂ ’ਤੇ ਲੱਗੇ ਕੈਮਰਿਆਂ ਜਾਂ ਗੱਡੀਆਂ ਵਿੱਚ ਲੱਗੇ ਕੈਮਰਿਆਂ ਦੀ ਫੁਟੇਜ਼। ਪੁਲਿਸ ਨੇ ਦੱਸਿਆ, ‘‘ਬੁੱਧਵਾਰ, 4 ਨਵੰਬਰ ਦੀ ਦੁਪਹਿਰ ਨੂੰ, ਅਧਿਕਾਰੀ ਭਲਾਈ ਜਾਂਚ ਲਈ ਚਰਟਸੀ ਰੋਡ ’ਤੇ ਇਕ ਘਰ ਵਿੱਚ ਗਏ ਸਨ।’’ ਉਨ੍ਹਾਂ ਦੱਸਿਆ, ‘‘ਉੱਥੇ ਉਨ੍ਹਾਂ ਨੂੰ 26 ਸਾਲਾ ਨਵਨੀਤ ਕੌਰ ਮਿਲੀ, ਜਿਸ ਨੂੰ ਗੋਲੀਆਂ ਲੱਗੀਆਂ ਹੋਈਆਂ ਸਨ। ਗੰਭੀਰ ਜ਼ਖ਼ਮੀ ਹੋਣ ਕਾਰਨ ਮੌਕੇ ’ਤੇ ਹੀ ਉਸਦੀ ਮੌਤ ਹੋ ਚੁੱਕੀ ਸੀ।’’

ਪੁਲਿਸ ਨੇ ਅੱਗੇ ਕਿਹਾ, ‘‘ਉਸਦੇ ਪਰਿਵਾਰਕ ਮੈਂਬਰਾਂ ਨੂੰ ਸੂਚਿਤ ਕਰ ਦਿੱਤਾ ਗਿਆ ਹੈ ਅਤੇ ਵਿਸ਼ੇਸ਼ ਅਧਿਕਾਰੀ ਉਨ੍ਹਾਂ ਦੀ ਮਦੱਦ ਕਰ ਰਹੇ ਹਨ।’’