ਯੂ.ਕੇ. ਵਿੱਚ ਸਿੱਖ ਵਿਅਕਤੀ ’ਤੇ ਕਤਲ ਦਾ ਦੋਸ਼

ਵਿਕਰਮ ਨੇ ਅਦਾਲਤ ਵਿੱਚ ਸਵੈ-ਰੱਖਿਆ ਦਾ ਹਵਾਲਾ ਦਿੱਤਾ

ਸਾਊਥੈਂਪਟਨ – ਬਰਤਾਨੀਆ ਦੀ ਅਦਾਲਤ ਵਿੱਚ ਚੱਲ ਰਹੀ ਸੁਣਵਾਈ ਦੌਰਾਨ 23 ਸਾਲਾ ਸਿੱਖ ਨੌਜਵਾਨ, ਵਿਕਰਮ ਦਿਗਵਾ ’ਤੇ 18 ਸਾਲਾ ਫਾਈਨਾਂਸ ਵਿਦਿਆਰਥੀ ਹੈਨਰੀ ਨੋਵਾਕ ਦੇ ਕਤਲ ਦਾ ਗੰਭੀਰ ਇਲਜ਼ਾਮ ਲਾਇਆ ਗਿਆ ਹੈ। ਸਰਕਾਰੀ ਵਕੀਲਾਂ ਅਨੁਸਾਰ, ਦਿਗਵਾ ਨੇ ਇਸ ਵਾਰਦਾਤ ਤੋਂ ਬਾਅਦ ਪੁਲਿਸ ਦੇ ਸ਼ੱਕ ਤੋਂ ਬਚਣ ਲਈ ਨਸਲਵਾਦ ਦਾ ਦਾਅਵਾ ਕੀਤਾ ਹੈ।

ਇਹ ਘਟਨਾ 3 ਦਸੰਬਰ, 2023 ਦੀ ਰਾਤ ਨੂੰ ਵਾਪਰੀ ਸੀ ਜਦੋਂ ਹੈਨਰੀ ਨੋਵਾਕ ਆਪਣੀ ਰਾਤ ਦੀ ਪਾਰਟੀ ਤੋਂ ਬਾਅਦ ਘਰ ਪਰਤ ਰਿਹਾ ਸੀ। ਅਦਾਲਤ ਨੂੰ ਦੱਸਿਆ ਗਿਆ ਕਿ ਦਿਗਵਾ ਨੇ 21 ਸੈਂਟੀਮੀਟਰ (8 ਇੰਚ) ਦੀ ਧਾਰਮਿਕ ਕਿਰਪਾਨ ਨਾਲ ਹੈਨਰੀ ’ਤੇ ਛੇ ਵਾਰ ਹਮਲਾ ਕੀਤਾ। ਹਮਲੇ ਤੋਂ ਬਾਅਦ, ਹੈਨਰੀ ਨੇ ਆਪਣੀ ਜਾਨ ਬਚਾਉਣ ਲਈ ਭੱਜਣ ਦੀ ਕੋਸ਼ਿਸ਼ ਕੀਤੀ, ਜਿਸ ਦੌਰਾਨ ਦਿਗਵਾ ਨੇ ਉਸਦੀ ਵੀਡੀਓ ਵੀ ਬਣਾਈ।
ਸਰਕਾਰੀ ਵਕੀਲ ਅਨੁਸਾਰ ਨਿਕੋਲਸ ਲੋਬੇਨਬਰਗ ਕੇਸੀ ਨੇ ਜਿਊਰੀ ਨੂੰ ਦੱਸਿਆ ਕਿ ਦਿਗਵਾ ਨੇ ਪੁਲਿਸ ਨੂੰ ਗੁੰਮਰਾਹ ਕਰਨ ਲਈ ਹੈਨਰੀ ’ਤੇ ਨਸਲੀ ਟਿੱਪਣੀਆਂ ਕਰਨ ਦਾ ਝੂਠਾ ਇਲਜ਼ਾਮ ਲਾਇਆ। ਇਸ ਝੂਠ ਦੇ ਨਤੀਜੇ ਵਜੋਂ, ਮੌਕੇ ’ਤੇ ਪਹੁੰਚੀ ਪੁਲਿਸ ਨੇ ਜ਼ਖ਼ਮੀ ਹੈਨਰੀ ਨੂੰ ਹੀ ਹੱਥਕੜੀਆਂ ਲਗਾ ਕੇ ਗਿ੍ਰਫ਼ਤਾਰ ਕਰ ਲਿਆ, ਜਦੋਂ ਕਿ ਉਹ ਮਰ ਰਿਹਾ ਸੀ। ਵਕੀਲ ਨੇ ਇਸ ਨੂੰ ਇੱਕ ‘‘ਘਿਨੌਣਾ ਝੂਠ’’ ਕਰਾਰ ਦਿੱਤਾ ਹੈ।
ਅਦਾਲਤ ’ਚ ਇਹ ਵੀ ਸਾਹਮਣੇ ਆਇਆ ਕਿ ਦਿਗਵਾ 12 ਸਾਲ ਦੀ ਉਮਰ ਤੋਂ ਹੀ ਹਥਿਆਰਾਂ ਦੀ ਸਿਖਲਾਈ ਲੈ ਰਿਹਾ ਸੀ ਅਤੇ ਉਸਨੂੰ ਚਾਕੂਆਂ ਤੇ ਹਥਿਆਰਾਂ ਦਾ ਬਹੁਤ ਸ਼ੌਕ ਸੀ। ਪੁਲਿਸ ਨੂੰ ਉਸਦੇ ਘਰੋਂ ਹੋਰ ਵੀ ਹਥਿਆਰ ਬਰਾਮਦ ਕੀਤੇ। ਸਰਕਾਰ ਪੱਖ ਦਾ ਕਹਿਣਾ ਹੈ ਕਿ ਹਾਲਾਂਕਿ ਸਿੱਖਾਂ ਨੂੰ ਜਨਤਕ ਤੌਰ ’ਤੇ ਕਿਰਪਾਨ ਰੱਖਣ ਦੀ ਕਾਨੂੰਨੀ ਇਜਾਜ਼ਤ ਹੈ, ਪਰ ਦਿਗਵਾ ਕੋਲ ਪਹਿਲਾਂ ਹੀ ਇੱਕ ਛੋਟੀ ਕਿਰਪਾਨ ਸੀ ਅਤੇ ਉਸ ਦਿਨ ਵਰਤੀ ਗਈ ਵੱਡੀ ਕਿਰਪਾਨ ਉਸਦੀ ਧਾਰਮਿਕ ਲੋੜ ਤੋਂ ਕਿਤੇ ਵੱਧ ਸੀ।

ਦਿਗਵਾ ਦੀ ਮਾਂ, 53 ਸਾਲਾ ਕਿਰਨ ਕੌਰ ’ਤੇ ਵੀ ਪੁੱਤ ਦੀ ਮਦੱਦ ਕਰਨ ਦੇ ਇਲਜ਼ਾਮ ਹਨ। ਦੋਸ਼ ਹੈ ਕਿ ਉਸਨੇ ਵਾਰਦਾਤ ਤੋਂ ਬਾਅਦ ਹਮਲੇ ਲਈ ਵਰਤੀ ਗਈ ਕਿਰਪਾਨ ਨੂੰ ਘਰ ਵਿੱਚ ਛੁਪਾ ਦਿੱਤਾ ਸੀ। ਵਿਕਰਮ ਦਿਗਵਾ ਨੇ ਕਤਲ ਅਤੇ ਗ਼ੈਰ-ਕਾਨੂੰਨੀ ਹਥਿਆਰ ਰੱਖਣ ਦੇ ਦੋਸ਼ਾਂ ਤੋਂ ਇਨਕਕਾਰ ਕੀਤਾ ਹੈ। ਫਿਲਹਾਲ ਮਾਮਲੇ ਦੀ ਸੁਣਵਾਈ ਜਾਰੀ ਹੈ।