ਰਾਜਵਿੰਦਰ ਕੌਰ ਗਿੱਲ ਨੇ ਇੰਗਲੈਂਡ ਵਿੱਚ ਪਹਿਲੀ ਸਿੱਖ ਔਰਤ ਹਾਈ ਸ਼ੈਰਿਫ ਬਣਨ ਦਾ ਮਾਣ ਪ੍ਰਾਪਤ ਕੀਤਾ

ਇਕ ਸਾਲ ਲਈ ਵਾਰਿਕਸ਼ਾਇਰ ਕਾਂਊਟੀ ਦੀ ਸੇਵਾ ਕਰਨਗੇ

ਲੰਡਨ (ਸਰਬਜੀਤ ਸਿੰਘ ਬਨੂੜ)- ਯੂ.ਕੇ. ਦੇ ਪ੍ਰਾਚੀਨ ਹਾਈ ਸੈਰਿਫ ਦੇ 1000 ਸਾਲਾਂ ਤੋਂ ਵੱਧ ਇਤਿਹਾਸ ਤੋਂ ਬਾਅਦ ਰਾਜਵਿੰਦਰ ਕੌਰ ਗਿੱਲ ਦੇ ਪਹਿਲੀ ਸਿੱਖ ਔਰਤ ਹਾਈ ਸੈਰਿਫ ਬਣਨ ਨਾਲ ਯੂ.ਕੇ. ਦੇ ਸਿੱਖ ਭਾਈਚਾਰੇ ਵਿੱਚ ਖੁਸ਼ੀ ਦੀ ਲਹਿਰ ਹੈ। ਰਾਜਵਿੰਦਰ ਕੌਰ ਗਿੱਲ ਵਾਰਿਕਸ਼ਾਇਰ ਦੀ 690ਵੀਂ ਹਾਈ ਸੈਰਿਫ ਹੋਵੇਗੀ ਅਤੇ ਉਹ 2024/25 ਸਾਲ ਲਈ ਕਾਉਂਟੀ ਦੀ ਸੇਵਾ ਕਰੇਗੀ।

ਜ਼ਿਕਰਯੋਗ ਹੈ ਕਿ ਹਾਈ ਸੈਰਿਫ ਦਾ ਦਫ਼ਤਰ ਕਾਉਂਟੀ ਵਿੱਚ ਸਿਰਫ਼ ਦੋ ਸਾਹੀ ਨਿਯੁਕਤੀਆਂ ਵਿੱਚੋਂ ਇੱਕ ਹੈ ਅਤੇ ਸੈਕਸ਼ਨ ਸਮੇਂ ਤੋਂ ਮੌਜੂਦ ਹੈ। ਇਤਿਹਾਸਕ ਤੌਰ ’ਤੇ ਸੈਰਿਫ ਫੌਜਾਂ ਨੂੰ ਵਧਾਉਣ, ਟੈਕਸ ਇਕੱਠਾ ਕਰਨ ਅਤੇ ਅਪਰਾਧੀਆਂ ਨੂੰ ਫੜ੍ਹਨ ਲਈ ਜ਼ਿੰਮੇਵਾਰ ਹੈ।

ਰਾਜਵਿੰਦਰ ਕੌਰ ਗਿੱਲ ਦਾ ਪਰਿਵਾਰ 1960 ਦੇ ਦਹਾਕੇ ਵਿੱਚ ਪੰਜਾਬ ਤੋਂ ਇੰਗਲੈਂਡ ਗਿਆ ਸੀ ਤੇ ਉਸ ਦਾ ਜਨਮ ਕੈਂਟ ਵਿੱਚ ਹੋਇਆ ਸੀ। ਉਹ ਪੰਜ ਭੈਣ-ਭਰਾ ਹਨ ਅਤੇ ਉਸ ਦਾ ਪਤੀ ਜਗਤਾਰ ਸਿੰਘ ਗਿੱਲ ਸਿੱਖਸ ਫ਼ਾਰ ਲੇਬਰ ਦਾ ਆਗੂ ਹੈ। ਉਨ੍ਹਾਂ ਦੇ ਤਿੰਨ ਬੱਚੇ ਹਨ। ਰਾਜਵਿੰਦਰ ਨੂੰ ਛੋਟੀ ਉਮਰ ਤੋਂ ਹੀ ਕਾਨੂੰਨ ਅਤੇ ਵਿਵਸਥਾ ਵਿੱਚ ਦਿਲਚਸਪੀ ਸੀ।

ਗਿੱਲ ਨੇ ਕਿਹਾ ਕਿ ਉਹ ਵਾਰਿਕਸ਼ਾਇਰ ਦੇ ਨੌਜਵਾਨਾਂ ਦਾ ਸਮਰਥਨ ਕਰਨ, ਅਪਰਾਧ ਨੂੰ ਘਟਾਉਣ, ਲੋਕਾਂ ਦੀ ਸੁਰੱਖਿਆ ਅਤੇ ਸਿੱਖਿਆ ਵਿੱਚ ਨਿਵੇਸ਼ ਕਰਨ, ਉਨ੍ਹਾਂ ਨੂੰ ਮੌਕੇ ਪ੍ਰਦਾਨ ਕਰਨ ਅਤੇ ਉਨ੍ਹਾਂ ਨੂੰ ਸਕਾਰਾਤਮਕ ਪ੍ਰਭਾਵ ਬਣਾਉਣ ਲਈ ਸ਼ਕਤੀ ਪ੍ਰਦਾਨ ਕਰਨ ਦੀ ਕੋਸ਼ਿਸ਼ ਵਿੱਚ ਹੈ। ਹਾਈ ਸੈਰਿਫ ਇੱਕ ਫੰਡ ਰਹਿਤ ਰਸਮੀ ਅਹੁਦਾ ਹੈ, ਜੋ ਨਿਆਂਪਾਲਿਕਾ ਅਤੇ ਵਰਦੀਧਾਰੀ ਜਨਤਕ ਸੇਵਾਵਾਂ ਦੇ ਨਾਲ-ਨਾਲ ਸਮਾਜ ਦੇ ਫਾਇਦੇ ਲਈ ਕੰਮ ਕਰਨ ਵਾਲੀਆਂ ਚੈਰਿਟੀ ਅਤੇ ਸਵੈ-ਸੇਵੀ ਸਮੂਹਾਂ ਦਾ ਸਮਰਥਨ ਕਰਦਾ ਹੈ।

2024/25 ਲਈ ਹਾਈ ਸੈਰਿਫ ਦੇ ਦਫ਼ਤਰ ਵਿੱਚ ਆਪਣੀ ਨਿਯੁਕਤੀ ਬਾਰੇ ਬੋਲਦਿਆਂ, ਰਾਜਵਿੰਦਰ ਕੌਰ ਗਿੱਲ ਨੇ ਕਿਹਾ ਕਿ ਵਾਰਿਕਸ਼ਾਇਰ ਦੇ ਲੋਕਾਂ ਦੀ ਸੇਵਾ ਕਰਨਾ ਇੱਕ ਬਹੁਤ ਵੱਡਾ ਸਨਮਾਨ ਹੈ।

ਇਸ ਮੌਕੇ ਦੋਸਤਾਂ, ਪਰਿਵਾਰ, ਵਾਰਿਕਸ਼ਾਇਰ ਪੁਲਸ ਕੈਡਿਟਾਂ, ਮਾਣਯੋਗ ਜੱਜਾਂ ਅਤੇ ਨਾਗਰਿਕ ਮਹਿਮਾਨਾਂ ਦੀ ਮੌਜੂਦਗੀ ਦੁਆਰਾ ਚਿੰਨ੍ਹਿਤ ਕੀਤਾ ਗਿਆ।