ਸਾਊਥਾਲ ਵਿਖੇ ਦਰਦਨਾਕ ਹਾਦਸੇ ਵਿੱਚ ਅਲ੍ਹੜ ਪੰਜਾਬੀ ਨੌਜਵਾਨ ਦੀ ਮੌਤ

ਹਾਦਸੇ ਦਾ ਜ਼ਿੰਮੇਵਾਰ ਸੁਖਵੀਰ ਸਿੰਘ ਪੁਲਿਸ ਵਲੋਂ ਗਿ੍ਰਫ਼ਤਾਰ

ਸਾਊਥਾਲ – ਇੱਥੇ ‘ਦੇਸ ਪ੍ਰਦੇਸ’ ਦਫ਼ਤਰ ਦੇ ਚੌਰਾਹੇ ਦੇ ਨੇੜੇ ਸਾਊਥ ਰੋਡ ਵਿਖੇ ਹੋਏ ਹਾਦਸੇ ਵਿੱਚ 17 ਸਾਲਾ ਅਲ੍ਹੜ ਮੁੰਡੇ ਦੀ ਮੌਤ ਹੋਣ ਦੀ ਖ਼ਬਰ ਹੈ।

ਮਿਲੀ ਜਾਣਕਾਰੀ ਅਨੁਸਾਰ ਬੀਤੇ ਸ਼ਨੀਵਾਰ ਤੜਕੇ ਪੰਜਾਬੀ ਨੌਜਵਾਨ ਸੁਖਵੀਰ ਸਿੰਘ ਮੁਸ਼ਟੈਂਗ ਕਾਰ ਤੇਜ਼ ਰਫ਼ਤਾਰ ਵਿੱਚ ਚਲਾ ਰਿਹਾ ਸੀ ਜਦ ਟ੍ਰੈਫਿਕ ਬੱਤੀਆਂ ਪਾਰ ਕਰਦੇ ਸਾਰ ਹੀ ਤੇਜ਼ ਰਫ਼ਤਾਰ ਕਾਰ ਉਸ ਦੇ ਕਾਬੂ ਵਿੱਚ ਨਹੀਂ ਰਹੀ ਅਤੇ ਉਸ ਨੇ ਨੇੜਲੇ ਮੋਰ ਫੂਡ ਸਟੋਰ ਦੇ ਬਾਹਰ ਪੈਦਲ ਜਾ ਰਹੇ 2 ਨੌਜਵਾਨਾ ਵਿੱਚ ਗੱਡੀ ਮਾਰ ਦਿੱਤੀ। ਇਥੇ ਨਾਲ ਹੀ ਰੋਹਿਤ ਵੈਜ਼ੀਟੇਰੀਅਨ ਖਾਣਿਆ ਦਾ ਸਟਾਰ ਹੈ ਜੋ ਉਨ੍ਹਾਂ ਦੇ ਲਾਜਵਾਬ ਤਾਜ਼ਾ ਸਮੋਸੇ ਪਕੌੜਿਆਂ ਲਈ ਜਾਣਿਆ ਜਾਂਦਾ ਹੈ।

ਇਸ ਹਾਦਸੇ ਵਿੱਚ 17 ਸਾਲਾ ਅਲ੍ਹੜ ਰਣਬੀਰ ਸਿੰਘ ਦੀ ਮੌਤ ਹੋ ਗਈ ਅਤੇ ਉਸ ਦਾ ਸਾਥੀ ਗੰਭੀਰ ਜ਼ਖ਼ਮੀ ਹੋ ਗਿਆ। ਖ਼ਬਰ ਮਿਲਣ ’ਤੇ ਮੈਟਰੋਪੋਲੀਟਨ ਪੁਲਿਸ ਅਤੇ ਐਂਬੂਲੈਂਸ ਮੌਕੇ ’ਤੇ ਪਹੁੰਚੇ ਪਰ ਰਣਬੀਰ ਸਿੰਘ ਨੂੰ ਬਚਾ ਨਾ ਸਕੇ ਜਦਕਿ ਉਸ ਦੇ ਸਾਥੀ ਨੂੰ ਮੁੱਢਲੀ ਡਾਕਟਰੀ ਸਹਾਇਤਾ ਤੋਂ ਬਾਅਦ ਹਸਪਤਾਲ ਪਹੁੰਚਾਇਆ ਗਿਆ।

ਮੈਟਰੋਪੋਲਿਟਨ ਪੁਲਿਸ ਨੇ ਸੁਖਬੀਰ ਸਿੰਘ ਨੂੰ ਗਿ੍ਰਫ਼ਤਾਰ ਕਰਨ ਉਪਰੰਤ ਸੋਮਵਾਰ ਨੂੰ ਅਕਸਬਿ੍ਰਜ਼ ਅਦਾਲਤ ਵਿੱਚ ਪੇਸ਼ ਕੀਤਾ ਗਿਆ ਅਤੇ ਅਦਾਲਤ ਨੇ ਉਸ 19 ਅਕਤੂਬਰ ਦੀ ਅਗਲੀ ਪੇਸ਼ੀ ਤੱਕ ਪੁਲਿਸ ਹਿਰਾਸਤ ਵਿੱਚ ਦੇ ਦਿੱਤਾ ਗਿਆ ਹੈ।

ਇਸ ਹਾਦਸੇ ਸਬੰਧੀ ਪੁਲਿਸ ਆਲੇ ਦੁਆਲੇ ਦੇ ਸੀ.ਸੀ.ਟੀ.ਵੀ. ਕੈਮਰੇ ਘੋਖ ਰਹੀ ਹੈ ਤਾਂਕਿ ਸਹੀ ਤਸਵੀਰ ਸਾਹਮਣੇ ਆ ਸਕੇ।

ਇੱਥੇ ਵਰਨਣਯੋਗ ਹੈ ਕਿ ਵੀਕਐਂਡ ’ਤੇ ਖਾਸਕਰ ਨੌਜਵਾਨ ਨਸ਼ੇ ਦੀ ਹਾਲਾਤ ਵਿੱਚ ਤੇਜ਼ ਰਫ਼ਤਾਰ ਗੱਡੀਆਂ ਦੀਆਂ ਆਪਸ ਵਿੱਚ ਕਾਰਾਂ ਦੌੜਾਂ ਲਾਉਦੇ ਹਨ ਜਿਸ ਕਾਰਨ ਹੋ ਸਕਦਾ ਕਿ ਇਹ ਹਾਦਸਾ ਵਾਪਰਿਆ ਹੋਵੇ ਜਿਸ ਦੇ ਸਿੱਟੇ ਵਜੋਂ 17 ਸਾਲਾ ਰਣਬੀਰ ਸਿੰਘ ਅਣਆਈ ਮੌਤੇ ਜਹਾਨ ਤੋਂ ਚਲਾ ਗਿਆ।