ਬੈਡਫਰਡ ਵਿਖੇ ਲੂਟਨ ਏਅਰਪੋਰਟ ਐਕਸਪ੍ਰੈੱਸ ਦੀਆਂ ਗੱਡੀਆਂ ਟਕਰਾਈਆਂ

ਕਈ ਲੋਕ ਜ਼ਖ਼ਮੀ ਹੋ ਗਏ

ਬੈੱਡਫਰਡ – ਇੱਥੇ ਸ਼ੁੱਕਰਵਾਰ ਨੂੰ ਇੱਕ ਵੱਡਾ ਰੇਲ ਹਾਦਸਾ ਵਾਪਰਿਆ, ਜਿੱਥੇ ਦੋ ਰੇਲ ਗੱਡੀਆਂ ਆਪਸ ਵਿੱਚ ਟਕਰਾ ਗਈਆਂ। ਬਿ੍ਰਟਿਸ਼ ਟ੍ਰਾਂਸਪੋਰਟ ਪੁਲਿਸ ਅਨੁਸਾਰ, ਇਹ ਟੱਕਰ ਬੈੱਡਫਰਡ ਨੇੜੇ ਹੋਈ ਹੈ।

ਮੀਡੀਆ ਰਿਪੋਰਟਾਂ ਵਿੱਚ ਇਸ ਹਾਦਸੇ ਦੌਰਾਨ ਇੱਕ ਵੀਡੀਓ ਵਿੱਚ ਦੇਖਿਆ ਗਿਆ ਹੈ ਕਿ ਇੱਕ ਰੇਲਗੱਡੀ ਦਾ ਅਗਲਾ ਹਿੱਸਾ ਦੂਜੀ ਰੇਲਗੱਡੀ ਦੇ ਪਿਛਲੇ ਹਿੱਸੇ ਨਾਲ ਬੁਰੀ ਤਰ੍ਹਾਂ ਫਸਿਆ ਹੋਇਆ ਹੈ, ਹਾਲਾਂਕਿ ਦੋਵੇਂ ਗੱਡੀਆਂ ਪਟੜੀ ’ਤੇ ਹੀ ਮੌਜੂਦ ਹਨ। ਘਟਨਾ ਦੀ ਸੂਚਨਾ ਮਿਲਦੇ ਹੀ ਈਸਟ ਆਫ਼ ਇੰਗਲੈਂਡ ਐਂਬੂਲੈਂਸ ਸਰਵਿਸ ਨੇ ਮੌਕੇ ’ਤੇ ਇੱਕ ਏਅਰ ਐਂਬੂਲੈਂਸ ਸਮੇਤ ਕਈ ਰਾਹਤ ਟੀਮਾਂ ਭੇਜੀਆਂ ਹਨ। ਇਹ ਹਾਦਸਾ ਬੈਡਫੋਰਟ ਦੇ ਦੱਖਣ ਵਿੱਚ ਵਾਪਰਿਆ ਹੈ ਅਤੇ ਐਮਰਜੈਂਸੀ ਸੇਵਾਵਾਂ ਨੇ ਆਮ ਲੋਕਾਂ ਨੂੰ ਉਸ ਇਲਾਕੇ ਤੋਂ ਦੂਰ ਰਹਿਣ ਦੀ ਅਪੀਲ ਕੀਤੀ ਹੈ।

ਟਰਾਂਸਪੋਰਟ ਮੰਤਰੀ ਹੇਡੀ ਐਲਗਜ਼ੈਂਡਰ ਨੇ ਸੋਸ਼ਲ ਮੀਡੀਆ ਪਲੇਟਫਾਰਮ ’ਤੇ ਇੱਕ ਪੋਸਟ ਰਾਹੀਂ ਇਸ ਘਟਨਾ ’ਤੇ ਡੂੰਘੀ ਚਿੰਤਾ ਪ੍ਰਗਟਾਈ ਹੈ। ਬੈਡਫੋਰਡਸ਼ਾਇਰ ਫਾਇਰ ਐਂਡ ਰੈਸਕਿੳੂ ਸਰਵਿਸ ਦੇ ਕਰਮਚਾਰੀ ਵੀ ਮੌਕੇ ’ਤੇ ਮੌਜੂਦ ਸਨ ਅਤੇ ਬਚਾਅ ਕਾਰਜਾਂ ਵਿੱਚ ਸਹਾਇਤਾ ਕਰ ਰਹੇ ਸਨ।

ਇਸ ਹਾਦਸੇ ਕਾਰਨ ਰੇਲ ਸੇਵਾਵਾਂ ਬੁਰੀ ਤਰ੍ਹਾਂ ਪ੍ਰਭਾਵਿਤ ਹੋਈਆਂ ਹਨ। ਰੇਲ ਆਪਰੇਟਰ ‘ਈਸਟ ਮਿਡਲੈਂਡਜ਼ ਰੇਲਵੇ’ ਨੇ ਐਲਾਨ ਕੀਤਾ ਕਿ ਉਹ ਕੁੱਝ ਸਮੇਂ ਲਈ ਲੰਡਨ ਦੇ ਅੰਦਰ ਜਾਂ ਬਾਹਰ ਕੋਈ ਵੀ ਸੇਵਾ ਚਲਾਉਣ ਵਿੱਚ ਅਸਮਰੱਥ ਹਨ। ਇਸ ਦੇ ਨਾਲ ਹੀ, ‘ਥੈਮਸਲਿੰਕ’ ਨੇ ਦੱਸਿਆ ਕਿ ਜਾਂਚ ਦੇ ਚਲਦਿਆਂ ਲੂਟਨ ਅਤੇ ਬੈਡਫੋਰਡ ਵਿਚਕਾਰ ਸਾਰੀਆਂ ਰੇਲ ਲਾਈਟਾਂ ਬੰਦ ਕਰ ਦਿੱਤੀਆਂ ਗਈਆਂ ਹਨ। ਅਧਿਕਾਰੀ ਫਿਲਹਾਲ ਹਾਦਸੇ ਦੇ ਕਾਰਨਾਂ ਦੀ ਜਾਂਚ ਕਰ ਰਹੇ ਹਨ। ਇਸ ਹਾਦਸੇ ਵਿੱਚ ਕਈ ਸਵਾਰੀਆਂ ਦੇ ਜ਼ਖ਼ਮੀ ਹੋਣ ਦੀ ਖ਼ਬਰ ਹੈ।