23 ਸਾਲਾ ਪੁਰਾਣੇ ਤਲਾਕ ਦੇ ਕੇਸ ਦਾ ਨਿਪਟਾਰਾ ਹੋਇਆ

ਵਰਸ਼ਾ ਗੋਹਿਲ ਨੂੰ 6.6 ਮਿਲੀਅਨ ਪੌਂਡ ਦਾ ਹਰਜਾਨਾ ਮਿਲਿਆ

ਲੰਡਨ – ਬਰਤਾਨੀਆ ਦੇ ਕਾਨੂੰਨੀ ਇਤਿਹਾਸ ਵਿੱਚ ਸਭ ਤੋਂ ਲੰਬੇ ਸਮੇਂ ਤੱਕ ਚੱਲੇ ਤਲਾਕ ਦੇ ਮਾਮਲਿਆਂ ਵਿੱਚੋਂ ਇੱਕ ਦਾ ਆਖ਼ਰਕਾਰ ਨਿਪਟਾਰਾ ਹੋ ਗਿਆ। ਭਾਰਤੀ ਮੂਲ ਦੀ ਵਰਸ਼ਾ ਗੋਇਲ ਨੇ ਆਪਣੇ ਸਾਬਕਾ ਪਤੀ ਵਿਰੁੱਧ 23 ਸਾਲਾਂ ਤੱਕ ਚੱਲੀ ਕਾਨੂੰਨੀ ਲੜਾਈ ਜਿੱਤ ਲਈ ਹੈ, ਜਿਸ ਤੋਂ ਬਾਅਦ ਅਦਾਲਤ ਨੇ ਉਸ ਨੂੰ 6.6 ਮਿਲੀਅਨ ਪੌਂਡ ਦਾ ਸੈਟਲਮੈਂਟ ਦੇਣ ਦਾ ਹੁਕਮ ਦਿੱਤਾ ਹੈ।

ਵਰਸ਼ਾ ਅਤੇ ਭਦਰੇਸ਼ ਗੋਹਿਲ ਦਾ ਵਿਵਾਦ ਸਾਲ 2002 ਵਿੱਚ ਸ਼ੁਰੂ ਹੋਇਆ ਸੀ, ਜਦੋਂ ਵਰਸ਼ਾ ਨੇ ਆਪਣੇ ਪਤੀ ’ਤੇ ਬੇਵਫ਼ਾਈ ਅਤੇ ਗਲਤ ਵਿਵਹਾਰ ਦੇ ਦੋਸ਼ ਲਗਾਉਦੇ ਹੋਏ ਤਲਾਕ ਦੀ ਅਰਜ਼ੀ ਦਿੱਤੀ ਸੀ। ਉਸ ਸਮੇਂ ਉਹ ਬਹੁਤ ਘੱਟ ਰਕਮ 2.7 ਲੱਖ ਪੌਂਡ ’ਤੇ ਸਹਿਮਤ ਹੋ ਗਈ ਸੀ, ਪਰ ਬਾਅਦ ਵਿੱਚ ਉਸ ਨੂੰ ਸ਼ੱਕ ਹੋਇਆ ਕਿ ਉਸ ਦੇ ਪਤੀ ਨੇ ਆਪਣੀ ਅਸਲੀ ਜਾਇਦਾਦ ਨੂੰ ਲੁਕਾਇਆ ਹੈ। ਸਾਲ 2007 ਵਿੱਚ ਮਾਮਲੇ ਨੇ ਨਵਾਂ ਮੋੜ ਲਿਆ, ਜਦੋਂ ਵਰਸ਼ਾ ਨੇ ਪੁਰਾਣੇ ਸਮਝੌਤੇ ਨੂੰ ਰੱਦ ਕਰਨ ਲਈ ਅਦਾਲਤ ਦਾ ਦਰਵਾਜ਼ਾ ਖੜਕਾਇਆ। ਜਾਂਚ ਵਿੱਚ ਸਾਹਮਣੇ ਆਇਆ ਕਿ ਭਦਰੇਸ਼ ਨੇ ਦੁਨੀਆ ਭਰ ਵਿੱਚ ਲਗਭਗ 28 ਮਿਲੀਅਨ ਪੌਂਡ ਦੀ ਜਾਇਦਾਦ ਲੁਕਾ ਕੇ ਰੱਖੀ ਸੀ। 2011 ਵਿਚ ਭਦਰੇਸ਼ ਨੂੰ ਮਨੀ ਲਾਂਡਰਿੰਗ ਅਤੇ ਧੋਖਾਧੜੀ ਦਾ ਦੋਸ਼ੀ ਪਾਏ ਜਾਣ ਤੋਂ ਬਾਅਦ ਨਾਈਜੀਰੀਆ ਵਿੱਚ 10 ਸਾਲ ਦੀ ਸਜ਼ਾ ਸੁਣਾਈ ਗਈ ਸੀ।

ਲੰਬੀ ਕਾਨੂੰਨੀ ਲੜਾਈ ਦੌਰਾਨ ਭਦਰੇਸ਼ ਨੇ ਦਲੀਲ ਦਿੱਤੀ ਸੀ ਕਿ ਫ੍ਰੀਜ਼ ਕੀਤੀ ਗਈ ਜਾਇਦਾਦ ਉਸ ਦੀ ਨਹੀਂ ਸੀ, ਜਦਕਿ ਵਰਸ਼ਾ ਦਾ ਕਹਿਣਾ ਸੀ ਕਿ ਇਹ ਜਾਇਦਾਦ ਉਨ੍ਹਾਂ ਦੇ ਵਿਆਹ ਦੌਰਾਨ ਬਣਾਈ ਗਈ ਸੀ। ਜਸਟਿਸ ਵਿਲੀਅਮਜ਼ ਨੇ ਫੈਸਲਾ ਸੁਣਾਉਦਿਆਂ ਭਦਰੇਸ਼ ਨੂੰ ‘ਬੇਈਮਾਨ’ ਕਰਾਰ ਦਿੱਤਾ ਅਤੇ 61 ਸਾਲਾ ਵਰਸ਼ਾ ਦੇ ਪੱਖ ਵਿੱਚ ਫੈਸਲਾ ਸੁਣਾਇਆ। ਅਦਾਲਤ ਨੇ ਮੰਨਿਆ ਕਿ ਜਾਇਦਾਦ ਦਾ ਕੁਝ ਹਿੱਸਾ ਉਨ੍ਹਾਂ ਜਾਇਜ਼ ਕਾਰੋਬਾਰਾਂ ਤੋਂ ਆਇਆ ਸੀ ਜੋ ਵਿਆਹ ਦੌਰਾਨ ਚੱਲ ਰਹੇ ਸਨ, ਇਸ ਲਈ ਵਰਸ਼ਾ ਦਾ ਉਸ ’ਤੇ ਹੱਕ ਹੈ। ਵਰਸ਼ਾ ਦੀ ਇਹ ਲੜਾਈ ਬਿ੍ਰਟੇਨ ਦੀ ਸੁਪਰੀਮ ਕੋਰਟ ਤੱਕ ਪਹੁੰਚੀ ਸੀ। ਸੁਪਰੀਮ ਕੋਰਟ ਦੇ ਜੱਜਾਂ ਨੇ ਉਸ ਨੂੰ ਵਿੱਤੀ ਸਮਝੌਤਿਆਂ ਨੂੰ ਦੁਬਾਰਾ ਖੋਲ੍ਹਣ ਅਤੇ ਨਵੇਂ ਦਾਅਵੇ ਕਰਨ ਦੀ ਇਜਾਜ਼ਤ ਦਿੱਤੀ ਸੀ, ਜਿਸ ਤੋਂ ਬਾਅਦ ਹੁਣ ਉਸਨੂੰ ਇਹ ਵੱਡੀ ਸਫ਼ਲਤਾ ਮਿਲੀ ਹੈ।