ਸਾਊਥਾਲ ਵਿਖੇ ਪੰਜਾਬੀ ਦੇ ਕਤਲ ਦਾ ਦੋਸ਼ੀ ਪੰਜਾਬੀ ਗਿ੍ਰਫ਼ਤਾਰ

ਨਵਜੋਤ ਨੇ ਗੁਰਭੇਜ ਦੇ ਚਾਕੂ ਮਾਰੇ

ਲੰਡਨ: ਇੱਥੇ ਸਾਊਥਾਲ ਇਲਾਕੇ ਵਿਚ ਇਕ 26 ਸਾਲ ਦੇ ਪੰਜਾਬੀ ਨੌਜੁਆਨ ਦੇ ਕਤਲ ਦੇ ਮਾਮਲੇ ਵਿਚ ਇਕ 20 ਸਾਲ ਦੇ ਪੰਜਾਬੀ ਨੌਜੁਆਨ ’ਤੇ ਦੋਸ਼ ਲਗਾਏ ਗਏ ਹਨ। ਮੈਟਰੋਪੋਲੀਟਨ ਪੁਲਿਸ ਅਨੁਸਾਰ, ਨਵਜੋਤ ਸਿੰਘ ’ਤੇ ਗੁਰਭੇਜ ਸਿੰਘ ਦੇ ਕਤਲ, ਇਰਾਦਾਪੂਰਵਕ ਗੰਭੀਰ ਸੱਟਾਂ ਪਹੁੰਚਾਉਣ ਅਤੇ ਘਾਤਕ ਹਥਿਆਰ ਰੱਖਣ ਦੇ ਦੋਸ਼ ਲਗਾਏ ਗਏ ਹਨ। ਇਹ ਦੁਖਦਾਈ ਘਟਨਾ 10 ਜੂਨ ਦੀ ਸਵੇਰ ਨੂੰ ਸਾਊਥਾਲ ਦੇ ਨੌਰਥ ਰੋਡ ’ਤੇ ਵਾਪਰੀ ਸੀ, ਜਿੱਥੇ ਗੁਰਭੇਜ ਸਿੰਘ ਨੂੰ ਚਾਕੂ ਮਾਰਿਆ ਗਿਆ ਸੀ, ਜਿਸ ਨਾਲ ਉਸ ਦੀ ਮੌਕੇ ’ਤੇ ਹੀ ਮੌਤ ਹੋ ਗਈ।

ਇਸ ਹਮਲੇ ਵਿਚ ਇਕ ਹੋਰ ਨੌਜੁਆਨ ਵੀ ਜ਼ਖ਼ਮੀ ਹੋਇਆ ਸੀ, ਜਿਸ ਨੂੰ ਇਲਾਜ ਤੋਂ ਬਾਅਦ ਹਸਪਤਾਲ ਤੋਂ ਛੁੱਟੀ ਮਿਲ ਗਈ ਹੈ। ਜਾਂਚ ਦੀ ਅਗਵਾਈ ਕਰ ਰਹੀ ਡਿਟੈਕਟਿਵ ਚੀਫ਼ ਇੰਸਪੈਕਟਰ ਐਲੀਸਨ ਫੌਕਸਵੈੱਲ ਨੇ ਕਿਹਾ, ‘‘ਅਫ਼ਸਰਾਂ ਨੇ ਗੁਰਭੇਜ ਦੀ ਮੌਤ ਤੋਂ ਬਾਅਦ ਵਿਆਪਕ ਜਾਂਚ ਕੀਤੀ ਹੈ, ਜਿਸ ਕਾਰਨ ਅਸੀਂ ਇਕ ਸ਼ੱਕੀ ਨੂੰ ਗਿ੍ਰਫ਼ਤਾਰ ਕੀਤਾ ਹੈ।’’ ਉਨ੍ਹਾਂ ਅੱਗੇ ਕਿਹਾ, ‘‘ਮੈਂ ਇਸ ਗੱਲ ਤੋਂ ਜਾਣੂ ਹਾਂ ਕਿ ਇਸ ਘਟਨਾ ਨੇ ਸਥਾਨਕ ਪੱਧਰ ’ਤੇ ਚਿੰਤਾ ਪੈਦਾ ਕੀਤੀ ਹੋਵੇਗੀ। ਮੈਂ ਉਨ੍ਹਾਂ ਲੋਕਾਂ ਦਾ ਵੀ ਧੰਨਵਾਦ ਕਰਦੀ ਹਾਂ ਜਿਨ੍ਹਾਂ ਨੇ ਸੀ.ਸੀ.ਟੀ.ਵੀ. ਅਤੇ ਹੋਰ ਜਾਣਕਾਰੀ ਪ੍ਰਦਾਨ ਕੀਤੀ ਹੈ, ਜਿਸ ਨਾਲ ਸਾਨੂੰ ਇਹ ਸਮਝਣ ਵਿਚ ਮਦਦ ਮਿਲੀ ਹੈ ਕਿ ਉਸ ਰਾਤ ਕੀ ਵਾਪਰਿਆ ਸੀ।’’ ਮੁਲਜ਼ਮ ਨਵਜੋਤ ਸਿੰਘ ਨੂੰ ਵੈਸਟਮਿੰਸਟਰ ਮੈਜਿਸਟਰੇਟ ਅਦਾਲਤ ਵਿਚ ਪੇਸ਼ ਕੀਤਾ ਗਿਆ ਹੈ ਅਤੇ ਹੁਣ ਉਹ ਸੋਮਵਾਰ ਨੂੰ ਓਲਡ ਬੇਲੀ ਕੋਰਟ ਵਿਚ ਪੇਸ਼ ਹੋਵੇਗਾ।