ਸਾਊਥਾਲ ਦੇ ਅਰਸ਼ਦੀਪ ਸਿੰਘ ਨੇ ਰਚਿਆ ਇਤਿਹਾਸ

ਵਿਸ਼ਵ ਜੰਗ ਬਾਅਦ ਰਾਇਲ ਏਅਰ ਫੋਰਸ ਦਾ ਦੂਜਾ ਫਾਈਟਰ ਪਾਇਲਟ ਬਣਿਆ

ਲੰਡਨ – ਸਾਊਥਾਲ ਦੇ ਨਿਵਾਸੀ 28 ਸਾਲਾ ਸਿੱਖ ਨੌਜਵਾਨ ਅਰਸ਼ਦੀਪ ਸਿੰਘ ਡਾਂਗ ਨੇ ਬਰਤਾਨੀਆ ਦੀ ਰਾਇਲ ਏਅਰ ਫੋਰਸ ਵਿੱਚ ਇੱਕ ਨਵਾਂ ਇਤਿਹਾਸ ਸਿਰਜ ਦਿੱਤਾ ਹੈ। ਫਲਾਈਟ ਲੈਫਟੀਨੈਂਟ ਅਰਸ਼ਦੀਪ ਸਿੰਘ ਦੂਜੀ ਸੰਸਾਰ ਜੰਗ ਤੋਂ ਬਾਅਦ ਰਾਇਲ ਏਅਰ ਫੋਰਸ ਵਿੱਚ ਬਤੌਰ ਫਾਈਟਰ ਪਾਇਲਟ ਗ੍ਰੈਜੂਏਟ ਹੋਣ ਵਾਲੇ ਦੂਜੇ ਸਿੱਖ ਬਣ ਗਏ ਹਨ ਜਦਕਿ ਗ੍ਰੇਵਜ਼ੈਂਡ ਵਾਸੀ ਮਹਿੰਦਰ ਸਿੰਘ ਪੂਜੀ ਦੂਜੀ ਵਿਸ਼ਵ ਜੰਗ ਵਿੱਚ ਭਾਰਤ ਵਲੋਂ ਬਰਤਾਨਵੀ ਫੌਜ ਦੇ ਪਹਿਲੇ ਫਾਈਟਰ ਸਨ।

ਸਾਊਥਾਲ ਦੇ ਨਿਵਾਸੀ ਅਰਸ਼ਦੀਪ ਸਿੰਘ ਦੀ ਗ੍ਰੈਜੂਏਸ਼ਨ ਦਾ ਸ਼ਾਨਦਾਰ ਸਮਾਰੋਹ ਬੀਤੇ ਸ਼ੁੱਕਰਵਾਰ, 14 ਅਗਸਤ ਨੂੰ ਉੱਤਰੀ ਵੇਲਜ਼ ਦੇ ਰਾਇਲ ਏਅਰ ਫੋਰਸ ਵੈਲੀ ਵਿਖੇ ਆਯੋਜਿਤ ਕੀਤਾ ਗਿਆ ਸੀ। ਉਹ ਪਹਿਲੇ ਸਿੱਖ ਸਿਖਲਾਈ ਲੈਣ ਵਾਲੇ ਪਾਇਲਟ ਸਨ ਜਿਨ੍ਹਾਂ ਨੇ ਯੂ.ਕੇ ਮਿਲਟਰੀ ਫਲਾਇੰਗ ਟ੍ਰੇਨਿੰਗ ਸਿਸਟਮ ਦੇ ਤਹਿਤ ‘4 ਫਲਾਇੰਗ ਟ੍ਰੇਨਿੰਗ ਸਕੂਲ’ ਵਿੱਚ ਟੈਕਸਨ ਜਹਾਜ਼ ’ਤੇ ਆਪਣੀ ਸਿਖਲਾਈ ਪੂਰੀ ਕੀਤੀ। ਉਨ੍ਹਾਂ ਦੀ ਚੋਣ 2024 ਵਿੱਚ ਫਾਸਟ ਜੈੱਟ ਸਟ੍ਰੀਮ ਲਈ ਕੀਤੀ ਗਈ ਸੀ ਅਤੇ ਜੁਲਾਈ 2026 ਵਿੱਚ ਉਨ੍ਹਾਂ ਨੇ ਸਫ਼ਲਤਾਪੂਰਵਕ ਆਪਣਾ ਵਿੰਗਜ਼ ਟੈਸਟ ਪਾਸ ਕੀਤਾ।

ਅਰਸ਼ਦੀਪ ਸਿੰਘ 1998 ਵਿੱਚ ਸਿਰਫ਼ ਛੇ ਸਾਲ ਦੀ ਉਮਰ ਵਿੱਚ ਆਪਣੇ ਪਰਿਵਾਰ ਨਾਲ ਯੂ.ਕੇ ਆ ਗਏ ਸਨ। ਉਨ੍ਹਾਂ ਦੇ ਦਾਦਾ ਸਰਦਾਰ ਸੰਤੋਖ ਸਿੰਘ ਡਾਂਗ ਦਾ ਸੁਪਨਾ ਸੀ ਕਿ ਉਨ੍ਹਾਂ ਦਾ ਪੁੱਤਰ ਪਾਇਲਟ ਬਣੇ, ਪਰ ਸਾਧਨਾਂ ਦੀ ਘਾਟ ਕਾਰਨ ਉਹ ਸੁਪਨਾ ਪੂਰੀ ਨਹੀਂ ਹੋ ਸਕਿਆ ਸੀ। ਹੁਣ ਅਰਸ਼ਦੀਪ ਨੇ ਆਪਣੇ ਦਾਦਾ ਜੀ ਦੀ ਉਸ ਇੱਛਾ ਨੂੰ ਪੂਰੀ ਕਰਕੇ ਪਰਿਵਾਰ ਦਾ ਨਾਂ ਰੌਸ਼ਨ ਕੀਤਾ ਹੈ। ਉਨ੍ਹਾਂ ਨੇ ਬਿ੍ਰਸਟਲ ਯੂਨੀਵਰਸਿਟੀ ਤੋਂ ਗਣਿਤ ਅਤੇ ਫਿਲਾਸਫ਼ੀ ਦੀ ਪੜ੍ਹਾਈ ਕੀਤੀ ਅਤੇ ਫ਼ਰਵਰੀ 2022 ਵਿੱਚ ਅਫ਼ਸਰ ਟ੍ਰੇਨਿੰਗ ਸ਼ੁਰੂ ਕੀਤੀ ਸੀ।

ਆਪਣੀ ਇਸ ਇਤਿਹਾਸਿਕ ਪ੍ਰਾਪਤੀ ’ਤੇ ਖੁਸ਼ੀ ਜ਼ਾਹਿਰ ਕਰਦਿਆਂ ਅਰਸ਼ਦੀਪ ਨੇ ਕਿਹਾ ਕਿ ਅੰਤਰਰਾਸ਼ਟਰੀ ਪੱਧਰ ’ਤੇ ਆਪਣੇ ਭਾਈਚਾਰੇ ਦੀ ਨੁਮਾਇੰਦਗੀ ਕਰਨਾ ਉਨ੍ਹਾਂ ਲਈ ਬਹੁਤ ਮਾਣ ਵਾਲੀ ਗੱਲ ਹੈ। ਉਨ੍ਹਾਂ ਕਿਹਾ ਕਿ ਭਾਵੇਂ ਉਹ ਦੂਜੀ ਸੰਸਾਰ ਜੰਗ ਤੋਂ ਬਾਅਦ ਅਜਿਹਾ ਕਰਨ ਵਾਲੇ ਪਹਿਲੇ ਸਿੱਖ ਹਨ, ਪਰ ਉਹ ਚਾਹੁੰਦੇ ਹਨ ਕਿ ਉਹ ਆਖ਼ਰੀ ਨਾ ਹੋਣ ਅਤੇ ਹੋਰ ਸਿੱਖ ਨੌਜਵਾਨ ਵੀ ਇਸ ਖੇਤਰ ਵਿੱਚ ਅੱਗੇ ਆਉਣ। ਉਨ੍ਹਾਂ ਨੇ ਆਪਣੀ ਇਸ ਸਫ਼ਲਤਾ ਦਾ ਸਿਹਰਾ ਆਪਣੇ ਪਰਿਵਾਰ ਅਤੇ ਸਿੱਖੀ ਪਰਵਰਿਸ਼ ਨੂੰ ਦਿੱਤਾ ਹੈ। ਇੱਥੇ ਜ਼ਿਕਰਯੋਗ ਹੈ ਕਿ ਦੂਜੀ ਵਿਸ਼ਵ ਜੰਗ ਮੌਕੇ ਮਹਿੰਦਰ ਸਿੰਘ ਪੂਜੀ ਨੇ ਬਰਤਾਵਨੀ ਰੋਇਲ ਇੰਡੀਅਨ ਫੋਰਸ ਵਲੋਂ ਹਿੱਸਾ ਲਿਆ ਸੀ ਜਿਸ ਦੀ ਬਹਾਦਰੀ ਨੂੰ ਸਲਾਮ ਕਰਦਾ ਬੁੱਤ ਗ੍ਰੇਵਜ਼ੈੱਡ ਵਿਖੇ ਐਮ.ਪੀ. ਤਨ ਢੇਸੀ ਦੀ ਅਗਵਾਈ ਵਿੱਚ ਸਥਾਪਿਤ ਕੀਤਾ ਗਿਆ ਹੈ।