ਬ੍ਰਮਿੰਘਮ ਵਿਖੇ ਵੇਸਵਾ ਦਾ ਕਤਲ ਕਰਨ ਵਾਲੇ ਤਨਵੀਰ ਸਿੰਘ ਨੂੰ 29 ਸਾਲਾਂ ਲਈ ਜੇਲ੍ਹ ਭੇਜਿਆ

ਅਦਾਲਤ ਨੇ ਕਾਤਲ ਨੂੰ ਚਾਲਬਾਜ਼ ਅਤੇ ਬੇਰਹਿਮ ਦੱਸਿਆ

ਬ੍ਰਮਿੰਘਮ – ਵੈਸਟ ਮਿਡਲੈਂਡਜ਼ ਖੇਤਰ ਵਿੱਚ ਇੱਕ ਔਰਤ ਦਾ ਗਲਾ ਘੁੱਟ ਕੇ ਕਤਲ ਕਰਨ ਅਤੇ ਉਸਦੀ ਲਾਸ਼ ਸੜਕ ਕਿਨਾਰੇ ਸੁੱਟਣ ਦੇ ਦੋਸ਼ ਵਿੱਚ ਬੁੱਧਵਾਰ ਨੂੰ ਇੱਕ ਪੰਜਾਬੀ ਡਰਾਈਵਰ ਨੂੰ 29 ਸਾਲ ਦੀ ਕੈਦ ਦੀ ਸਜ਼ਾ ਸੁਣਾਈ ਗਈ। ਔਰਤ ਦੀ ਲਾਸ਼ ਪਿਛਲੇ ਅਗਸਤ ਵਿੱਚ ਸਮੈਦਿਕ ਵਿੱਚ ਇੱਕ ਰਾਹਗੀਰ ਨੂੰ ਲੱਭੀ ਸੀ। 32 ਸਾਲਾ ਤਨਵੀਰ ਸਿੰਘ ’ਤੇ 41 ਸਾਲਾ ਸ਼ਾਰਾ ਮਿਲਰ ਦੀ ਹੱਤਿਆ ਦਾ ਦੋਸ਼ ਲਗਾਇਆ ਗਿਆ ਸੀ। ਵੁਲਵਰਹੈਂਪਟਨ ਕਰਾੳੂਨ ਕੋਰਟ ਵਿੱਚ ਸਜ਼ਾ ਸੁਣਾਉਦੇ ਹੋਏ, ਜੱਜ ਮਾਈਕਲ ਚੈਂਬਰਜ਼ ਨੇ ਸਿੰਘ ਨੂੰ ਇੱਕ ‘‘ਚਾਲਬਾਜ਼ ਅਤੇ ਬੇਰਹਿਮ’’ ਆਦਮੀ ਦੱਸਿਆ ਜਿਸਨੇ ਆਪਣੇ ਕੰਮਾਂ ਲਈ ਕੋਈ ਪਛਤਾਵਾ ਨਹੀਂ ਦਿਖਾਇਆ।

ਵੈਸਟ ਮਿਡਲੈਂਡਜ਼ ਪੁਲਿਸ ਦੇ ਡਿਟੈਕਟਿਵ ਇੰਸਪੈਕਟਰ ਜੋਅ ਡੇਵਨਪੋਰਟ ਨੇ ਕਿਹਾ, ‘‘ਸ਼ਾਰਾ ਦਾ ਇੱਕ ਖਤਰਨਾਕ ਅਪਰਾਧੀ ਦੁਆਰਾ ਬੇਰਹਿਮੀ ਨਾਲ ਕਤਲ ਕਰ ਦਿੱਤਾ ਗਿਆ ਸੀ।’’ ਉਨ੍ਹਾਂ ਕਿਹਾ ਕਿ ਘਟਨਾ ਵਾਲੀ ਰਾਤ ਸਿੰਘ ਇੱਕ ਪੱਬ ਵਿੱਚ ਸ਼ਰਾਬ ਪੀ ਰਿਹਾ ਸੀ ਅਤੇ ਬਾਅਦ ਵਿੱਚ ਸੈਕਸ ਵਰਕਰਾਂ ਦੀ ਭਾਲ ਵਿੱਚ ਸੋਹੋ ਰੋਡ ਗਿਆ ਸੀ। ਫਿਰ ਉਸਨੇ ਸ਼ਾਰਾ ਨੂੰ ਆਪਣੀ ਵੈਨ ਵਿੱਚ ਬਿਠਾਇਆ, ਜਿੱਥੇ ਉਸ ’ਤੇ ਜਾਨਲੇਵਾ ਹਮਲਾ ਕੀਤਾ ਗਿਆ। ਪੁਲਿਸ ਜਾਂਚ ਵਿੱਚ ਇਹ ਵੀ ਸਾਹਮਣੇ ਆਇਆ ਕਿ ਸਿੰਘ ਨੇ ਫੋਰੈਂਸਿਕ ਸਬੂਤਾਂ ਨੂੰ ਨਸ਼ਟ ਕਰਨ ਲਈ ਪੀੜ੍ਹਤਾ ਦੇ ਸਰੀਰ ’ਤੇ ਤਰਲ ਪਦਾਰਥ ਡੋਲ੍ਹਿਆ ਸੀ।

ਇਸ ਮਹੀਨੇ ਦੇ ਸ਼ੁਰੂ ਵਿੱਚ ਵੁਲਵਰਹੈਂਪਟਨ ਕਰਾੳੂਨ ਕੋਰਟ ਦੀ ਇੱਕ ਜਿੳੂਰੀ ਨੇ ਸਿੰਘ ਨੂੰ ਸ਼ਾਰਾ ਦੇ ਕਤਲ ਦਾ ਦੋਸ਼ੀ ਠਹਿਰਾਇਆ ਸੀ। ਦੋ ਹਫ਼ਤਿਆਂ ਦੀ ਸੁਣਵਾਈ ਦੌਰਾਨ ਅਦਾਲਤ ਨੂੰ ਦੱਸਿਆ ਗਿਆ ਕਿ ਸ਼ਾਰਾ ਦੇ ਸਿਰ ਵਿੱਚ ਸੱਟਾਂ ਸਨ ਅਤੇ ਇੱਕ ਫੋਰੈਂਸਿਕ ਪੋਸਟਮਾਰਟਮ ਵਿੱਚ ਮੌਤ ਦਾ ਕਾਰਨ ਗਲਾ ਘੁੱਟਣ ਪਾਇਆ ਗਿਆ। ਵੈਸਟ ਮਿਡਲੈਂਡਜ਼ ਪੁਲਿਸ ਨੇ ਕਤਲ ਦੀ ਜਾਂਚ ਸ਼ੁਰੂ ਕੀਤੀ ਅਤੇ ਸੀਸੀਟੀਵੀ ਫੁਟੇਜ ਦੀ ਜਾਂਚ ਕੀਤੀ, ਜਿਸ ਵਿੱਚ ਸ਼ੱਕੀ ਵਿਅਕਤੀ ਸ਼ਾਰਾ ਦੀ ਲਾਸ਼ ਨੂੰ ਇੱਕ ਚਿੱਟੇ ਰੰਗ ਦੀ ਵੈਨ ਤੋਂ ਕੱਢਦਾ, ਫੁੱਟਪਾਥ ’ਤੇ ਛੱਡਦਾ ਅਤੇ ਫਿਰ ਤਰਲ ਪਦਾਰਥ ਨਾਲ ਛਿੜਕਦਾ ਦੇਖਿਆ ਗਿਆ।

ਪੁਲਿਸ ਨੇ ਕਿਹਾ ਕਿ ਜਾਂਚ ਵਿੱਚ ਖੁਲਾਸਾ ਹੋਇਆ ਹੈ ਕਿ ਵੈਨ ਇਅਕ ਕਿਰਾਏ ਦੀ ਕੰਪਨੀ ਕੋਲ ਰਜਿਸਟਰਡ ਸੀ ਅਤੇ ਪਾਰਸਲ ਡਿਲੀਵਰੀ ਲਈ ਵਰਤੀ ਜਾ ਰਹੀ ਸੀ। ਘਟਨਾ ਦੇ ਸਮੇਂ, ਵੈਨ ਤਨਵੀਰ ਸਿੰਘ ਦੇ ਕੋਲ ਸੀ। ਪੁਲਿਸ ਅਧਿਕਾਰੀਆਂ ਨੇ ਵੈਸਟ ਬ੍ਰੋਮਵਿਚ ਵਿੱਚ ਸਿੰਘ ਦਾ ਪਤਾ ਲਗਾਇਆ ਅਤੇ ਬਾਅਦ ਵਿੱਚ ਉਸਨੂੰ ਕਤਲ ਦੇ ਸ਼ੱਕ ਵਿੱਚ ਗਿ੍ਰਫ਼ਤਾਰ ਕਰ ਲਿਆ।