ਨਕਲੀ ਡਾਕੇ ਦਾ ਡਰਾਮਾ ਰਚਣ ਵਾਲਾ ਪੰਜਾਬੀ ਪਰਿਵਾਰ ਦੋਸ਼ੀ ਕਰਾਰ

ਸਜ਼ਾ ਦਾ ਫੈਸਲਾ 6 ਜੂਨ ਨੂੰ

ਲੰਡਨ 3-4-2005 (ਸਰਬਜੀਤ ਸਿੰਘ ਬਨੂੜ) – ਲੰਡਨ ਦੇ ਹੰਸਲੋ ਬਾਰ੍ਹੋ ’ਚ ਆਪਣੇ ਡਾਕਘਰ ਵਿੱਚ ਹਥਿਆਰਬੰਦ ਡਕੈਤੀ ਦਾ ਡਰਾਮਾ ਰਚਣ ਵਾਲੇ ਪੰਜਾਬੀ ਪਰਿਵਾਰ ਨੂੰ ਅਦਾਲਤ ਨੇ ਦੋਸ਼ੀ ਕਰਾਰ ਦਿੱਤਾ ਹੈ। ਅਦਾਲਤ ਵੱਲੋਂ 6 ਜੂਨ ਨੂੰ ਸਜ਼ਾ ਸੁਣਾਈ ਜਾਵੇਗੀ। ਹੰਸਲੋ ਵਿਖੇ ਪੰਜਾਬੀ ਪਰਿਵਾਰ ਨੂੰ ਆਪਣੇ ਹੀ ਡਾਕਘਰ ਵਿੱਚ 1,36000 ਪੌਂਡ ਹਥਿਆਰਬੰਦ ਡਾਕੇ ਦਾ ਡਰਾਮਾ ਕਰਨ ਵਾਲੇ ਗ੍ਰੇਟ ਵੈਸਟ ਰੋਡ, ਹੰਸਲੋ ਦੇ 41 ਸਾਲਾ ਰਾਜਵਿੰਦਰ ਕਾਹਲੋਂ, 38 ਸਾਲਾ ਸੁਖਵੀਰ ਢਿੱਲੋਂ, 40 ਸਾਲਾ ਰਮਨਦੀਪ ਢਿੱਲੋਂ, 67 ਸਾਲਾ ਸੁਨਾਵਰ ਢਿੱਲੋਂ, ਸਾਰੇ ਲਾਇਨ ਰੋਡ, ਵਰਜੀਨੀਆ ਵਾਟਰ ਦੇ ਰਹਿਣ ਵਾਲਿਆਂ ਨੂੰ ਆਈਲਵਰਥ ਕਰਾੳੂਨ ਕੋਰਟ ਵਿੱਚ ਨਿਆਂ ਦੇ ਰਾਹ ਨੂੰ ਵਿਗਾੜਨ ਦੀ ਸਾਜ਼ਿਸ਼, ਮਨੀ ਲਾਂਡਰਿੰਗ ਦੀ ਸਾਜ਼ਿਸ਼ ਅਤੇ ਡਾਕਘਰ ਤੋਂ ਚੋਰੀ ਕਰਨ ਦੀ ਸਾਜ਼ਿਸ਼ ਦੇ ਦੋਸ਼ੀ ਪਾਇਆ ਗਿਆ।

ਇਸ ਡਾਕੇ ਲਈ ਪੁਲਿਸ ਨੇ ਡੀ.ਐੱਨ.ਏ. ਅਤੇ ਸੀਸੀਟੀਵੀ ਦੀ ਵਰਤੋਂ ਕਰਕੇ ਇੱਕ ਵਿਅਕਤੀ ਦੀ ਪਛਾਣ ਕੀਤੀ ਜਿਸਨੇ ਮੌਕੇ ਤੋਂ ਭੱਜਣ ਵੇਲੇ ਆਪਣੇ ਆਪ ਨੂੰ ਸੱਟ ਮਾਰਨ ਤੋਂ ਬਾਅਦ ਹਥਿਆਰਬੰਦ ਡਕੈਤੀ ਦੀ ਵਾਰਦਾਤ ਨੂੰ ਅੰਜ਼ਾਮ ਦਿੱਤਾ ਸੀ। ਰਾਜਵਿੰਦਰ ਕਾਹਲੋਂ ਉਨ੍ਹਾਂ ਪੰਜ ਲੋਕਾਂ ਵਿੱਚੋਂ ਇੱਕ ਸੀ ਜਿਨ੍ਹਾਂ ਨੇ ਬ੍ਰਾਬਾਜ਼ੋਨ ਰੋਡ ’ਤੇ ਸ਼ਾਖਾ ਤੋਂ ਲਗਭਗ 1,36000 ਪੌਂਡ ਚੋਰੀ ਕੀਤੇ ਸਨ। ਜਿਵੇਂ ਹੀ ਉਹ ਮੌਕੇ ਤੋਂ ਭੱਜ ਰਿਹਾ ਸੀ, ਉਸਨੇ ਧਾਤ ਦੀ ਵਾੜ ਉੱਤੇ ਚੜ੍ਹਦੇ ਹੋਏ ਆਪਣੇ ਆਪ ਨੂੰ ਸੱਟ ਮਾਰ ਲੀ ਅਤੇ ਪੁਲਿਸ ਨੇ ਇਸ ਸਬੂਤ ਦੇ ਨਾਲ-ਨਾਲ ਵੱਡੀ ਮਾਤਰਾ ਵਿੱਚ ਸੀਸੀਟੀਵੀ ਅਤੇ ਫ਼ੋਨ ਡੇਟਾ ਦੀ ਵਰਤੋਂ ਕਰਕੇ ਸ਼ਾਮਿਲ ਲੋਕਾਂ ਦੀ ਪਛਾਣ ਕੀਤੀ ਅਤੇ ਉਨ੍ਹਾਂ ਨੂੰ ਅਦਾਲਤ ਵਿੱਚ ਪੇਸ਼ ਕੀਤਾ।

ਡਾਕਖਾਨੇ ਵਿੱਚ ਕੰਮ ਕਰਨ ਵਾਲੀਆਂ ਦੋ ਔਰਤਾਂ ਨੂੰ ਬਾਅਦ ਵਿੱਚ ਸਾਜ਼ਿਸ਼ ਦਾ ਹਿੱਸਾ ਪਾਇਆ ਗਿਆ। ਅਧਿਕਾਰੀਆਂ ਨੇ ਦੱਸਿਆ ਕਿ ਔਰਤਾਂ ਨੇ ਡਰਾਮਾ ਕੀਤਾ ਕਿ ਇੱਕ ਬੰਦੂਕ ਵਾਲੇ ਵਿਅਕਤੀ ਦੁਆਰਾ ਧਮਕੀ ਦਿੱਤੀ ਗਈ ਸੀ ਜਿਸਨੇ 50,000 ਪੌਂਡ ਤੇ ਨਾਲ ਹੀ ਸ਼ਾਖਾ ਦਾ ਸੀਸੀਟੀਵੀ ਸਿਸਟਮ ਚੋਰੀ ਕਰ ਲਿਆ ਦੱਸਿਆ ਸੀ। ਡਾਕਘਰ ਦੁਆਰਾ ਕੀਤੇ ਗਏ ਇੱਕ ਆਡਿਟ ਵਿੱਚ ਪਾਇਆ ਗਿਆ ਕਿ ਸਟੋਰ ਵਿੱਚੋਂ ਗੁੰਮ ਹੋਏ ਪੈਸੇ ਦੀ ਅਸਲ ਰਕਮ ਲਗਭਗ 1,36000 ਪੌਂਡ ਸੀ।

ਮੈਟਰੋਪੋਲੀਟਨ ਪੁਲਿਸ ਦੇ ਫਲਾਇੰਗ ਸਕੁਐਂਡ ਦੇ ਜਾਸੂਸਾਂ ਨੇ ਜਾਂਚ ਸ਼ੁਰੂ ਕਰ ਸ਼ੱਕੀ ਵਿਅਕਤੀ ਦੀ ਪਛਾਣ ਕਰਨ ਲਈ ਦੁਕਾਨ ਦੇ ਆਲੇ ਦੁਆਲੇ ਦੇ ਇਲਾਕੇ ਤੋਂ ਸੀਸੀਟੀਵੀ ਦੀ ਜਾਂਚ ਕੀਤੀ। ਉਨ੍ਹਾਂ ਨੇ ਉਸਨੂੰ ਇੱਕ ਨੇੜਲੀ ਕਾਰ ਤੱਕ ਟਰੈਕ ਕੀਤਾ ਜੋ ਕਾਹਲੋਂ ਦੇ ਨਾਮ ’ਤੇ ਰਜਿਸਟਰਡ ਸੀ ਤੇ ਉਸਦਾ ਡੀ.ਐੱਨ.ਏ. ਵੀ ਵਾੜ ’ਤੇ ਮਿਲਿਆ ਤੇ ਪੁਲਸ ਨੇ ਡਾਕੇ ਦੀ ਗੁੱਥੀ ਨੂੰ ਸੁਲਝਾ ਲਿਆ। ਕਾਹਲੋਂ ਦੇ ਫ਼ੋਨ ਦੀ ਜਾਂਚ ਤੋਂ ਪਤਾ ਲੱਗਾ ਕਿ ਉਹ ਸੁਖਵੀਰ ਢਿੱਲੋਂ ਨਾਮਕ ਇੱਕ ਵਿਅਕਤੀ ਨਾਲ ਲਗਾਤਾਰ ਸੰਪਰਕ ਵਿੱਚ ਸੀ। ਢਿੱਲੋਂ ਉਸ ਸ਼ਾਖਾ ਅਤੇ ਉਸ ਸਟੋਰ ਦਾ ਮਾਲਕ ਸੀ ਜਿਸ ਨਾਲ ਇਹ ਜੁੜਿਆ ਹੋਇਆ ਸੀ ਤੇ ਕਾਹਲੋਂ ਦਾ ਚਚੇਰਾ ਭਰਾ ਵੀ ਹੈ। ਪਰਿਵਾਰ ਦੇ ਤਿੰਨ ਹੋਰ ਮੈਂਬਰ, ਰਮਨਦੀਪ ਢਿੱਲੋਂ ਅਤੇ ਸੁਨਾਵਰ ਢਿੱਲੋਂ, ਮਨਦੀਪ ਗਿੱਲ ਨੂੰ ਵੀ ਸਾਜ਼ਿਸ਼ ਬਾਰੇ ਜਾਣੂ ਪਾਇਆ ਗਿਆ।

ਮੈਟਰੋਪੋਲੀਟਨ ਪੁਲਸ ਦੇ ਫਲਾਇੰਗ ਸਕੁਐਂਡ ਦੇ ਡਿਟੈਕਟਿਵ ਚੀਫ਼ ਇੰਸਪੈਕਟਰ ਸਕਾਟ ਮੈਥਰ ਨੇ ਕਿਹਾ ਕਿ ਇਹ ਇੱਕ ਗੁੰਝਲਦਾਰ ਜਾਂਚ ਸੀ ਜਿਸ ਵਿੱਚ ਵੱਡੀ ਮਾਤਰਾ ਵਿੱਚ ਸੀਸੀਟੀਵੀ, ਫ਼ੋਨ ਅਤੇ ਵਿੱਤੀ ਡੇਟਾ ਅਤੇ ਡੀ.ਐੱਨ.ਏ. ਸਬੂਤ ਇਕੱਠੇ ਕਰਨਾ ਸ਼ਾਮਿਲ ਸੀ। ਅਦਾਲਤ ਵੱਲੋਂ ਪੰਜੇ ਦੋਸ਼ੀਆਂ ਨੂੰ ਸ਼ੁੱਕਰਵਾਰ 6 ਜੂਨ ਨੂੰ ਸਜ਼ਾ ਸੁਣਾਈ ਜਾਵੇਗੀ।