ਛੋਟਾ ਜਹਾਜ਼ ਚਲਾਉਣ ਦੇ ਸ਼ੌਕੀਨ ਭਾਰਤੀ ਪਤੀ ਪਤਨੀ ਦੀ ਹਵਾਈ ਹਾਦਸੇ ਵਿੱਚ ਮੌਤ

ਲੰਬੀ ਜਾਂਚ ਬਾਅਦ ਜਹਾਜ਼ ਦਾ ਮਲਬਾ ਲੱਭਾ

ਲੰਡਨ – ਬਰਤਾਨੀਆ ਦੇ ਨੌਰਥ ਵੇਲਜ਼ ਦੇ ਇੱਕ ਇਲਾਕੇ ਵਿੱਚ ਇੱਕ ਛੋਟੇ ਜਹਾਜ਼ ਦੇ ਹਾਦਸਾਗ੍ਰਸਤ ਹੋਣ ਕਾਰਨ ਭਾਰਤੀ ਮੂਲ ਦੇ ਇੱਕ ਪਤੀ-ਪਤਨੀ ਦੀ ਮੌਤ ਹੋਣ ਦੀ ਖ਼ਬਰ ਸਾਹਮਣੇ ਆਈ ਹੈ। ਮਿ੍ਰਤਕਾਂ ਦੀ ਉਮਰ 50 ਤੋਂ 55 ਸਾਲ ਦੇ ਵਿਚਕਾਰ ਦੱਸੀ ਜਾ ਰਹੀ ਹੈ।

ਮਿ੍ਰਤਕਾਂ ਦੀ ਪਛਾਣ ਕੇਤਲ ਸਵਾਲੀ ਅਤੇ ਉਨ੍ਹਾਂ ਦੀ ਪਤਨੀ ਸ਼ੀਤਲ ਵਜੋਂ ਹੋਈ ਹੈ। ਮੰਨਿਆ ਜਾ ਰਿਹਾ ਹੈ ਕਿ ਕੇਤਨ ਸਵਾਲੀ ਖ਼ੁਦ ‘ਪਾਈਪਰ ਪੀਏ28’ ਜਹਾਜ਼ ਦੇ ਪਾਇਲਟ ਵਜੋਂ ਚਲਾ ਰਹੇ ਸਨ। ਉਨ੍ਹਾਂ ਨੇ ਲੰਘੇ ਹਫ਼ਤੇ ਇੰਗਲੈਂਡ ਦੇ ਵੈਸਟ ਮਿਡਲੈਂਡਜ਼ ਖੇਤਰ ਵਿੱਚ ਬਰਟਨ-ਅਪੌਨ-ਟ੍ਰੈਂਟ ਦੇ ਟੈਟਨਹਿਲ ਹਵਾਈ ਅੱਡੇ ਤੋਂ ਉਡਾਣ ਭਰੀ ਸੀ। ਪਰ ਜਦੋਂ ਜਹਾਜ਼ ਨਿਰਧਾਰਤ ਸਮੇਂ ’ਤੇ ਉੱਤਰੀ-ਪੱਛਮੀ ਵੇਲਜ਼ ਦੇ ਸਨੋਡੋਨੀਆ ਸਥਿਤ ਕਾਰਨਰਫੋਨ ਹਵਾਈ ਅੱਡੇ ’ਤੇ ਨਹੀਂ ਉਤਰਿਆ, ਤਾਂ ਸ਼ੁੱਕਰਵਾਰ ਨੂੰ ਪੁਲਿਸ ਅਤੇ ਹੋਰ ਏਜੰਸੀਆਂ ਵੱਲੋਂ ਹਵਾਈ ਅਤੇ ਜ਼ਮੀਨੀ ਪੱਧਰ ’ਤੇ ਇੱਕ ਵੱਡੀ ਖੋਜ ਮੁਹਿੰਮ ਸ਼ੁਰੂ ਕੀਤੀ ਗਈ।

ਨੌਰਥ ਵੇਲਜ਼ ਪੁਲਿਸ ਦੇ ਬੁਲਾਰੇ ਅਨੁਸਾਰ, ਕਈ ਸਰਕਾਰੀ ਏਜੰਸੀਆਂ ਦੀ ਸਾਂਝੀ ਖੋਜ ਤੋਂ ਬਾਅਦ ਜਹਾਜ਼ ਦਾ ਮਲਬਾ ਟ੍ਰਾਸਫਿਨਿਡ ਦੇ ਨੇੜੇ ਇੱਕ ਦੂਰ-ਦੁਰਾਡੇ ਖੇਤਰ ਵਿੱਚੋਂ ਬਰਾਮਦ ਹੋਇਆ। ਹਾਦਸਾ ਇੰਨਾ ਭਿਆਨਕ ਸੀ ਕਿ ਜਹਾਜ਼ ਵਿੱਚ ਸਵਾਰ ਲੋਕਾਂ ਨੂੰ ਮੌਕੇ ’ਤੇ ਹੀ ਮਿ੍ਰਤਕ ਐਲਾਨ ਦਿੱਤਾ ਗਿਆ।

ਇਸ ਹਾਦਸੇ ਦੀ ਜਾਣਕਾਰੀ ‘ਏਅਰ ਐਕਸੀਡੈਂਟ ਇਨਵੈਸਟੀਗੇਸ਼ਨ ਬ੍ਰਾਂਚ’ ਨੂੰ ਦੇ ਦਿੱਤੀ ਗਈ ਹੈ, ਜਿਸ ਨੇ ਹਾਦਸੇ ਦੇ ਅਸਲ ਕਾਰਨਾਂ ਦੀ ਜਾਂਚ ਲਈ ਆਪਣੀ ਇੱਕ ਵਿਸ਼ੇਸ਼ ਟੀਮ ਤਾਇਨਾਤ ਕਰ ਦਿੱਤੀ ਹੈ।

ਕਾਰੋਬਾਰੀ ਰਿਕਾਰਡ ਦੇ ਅਨੁਸਾਰ, ਕੇਤਲ ਸਵਾਲੀ ਲੈਸਟਰ ਸਥਿਤ ਇੱਕ ਇੰਜੀਨੀਅਰਿੰਗ ਫਰਮ ‘ਆਰਕ ਯੂਰੋ ਟ੍ਰੇਡ ਲਿਮਟਿਡ’ ਵਿੱਚ ਬਤੌਰ ਡਾਇਰੈਕਟਰ ਕੰਮ ਕਰ ਰਹੇ ਸਨ। ਪਰ ਉਨ੍ਹਾਂ ਨੇ ਇਹ ਕਾਰੋਬਾਰ ਬੰਦ ਕਰ ਦਿੱਤਾ ਸੀ।