ਈਸਟ ਲੰਡਨ ਵਿਖੇ ਭਾਰਤੀ ਰੈਸਟੋਰੈਂਟ ਵਿੱਚ ਅੱਗ ਲਾਉਣ ਵਾਲੇ ਦੋਸ਼ੀਆਂ ਨੂੰ ਕੈਦ ਦੀ ਸਜ਼ਾ

ਦੋ ਨਾਬਾਲਗਾਂ ਨੂੰ 10-10 ਸਾਲ ਦੀ ਜੇਲ੍ਹ

ਲੰਡਨ – ਇੱਥੇ ਈਸਟ ਲੰਡਨ ਵਿੱਚ ਇੱਕ ਭਾਰਤੀ ਰੈਸਟੋਰੈਂਟ ਨੂੰ ਅੱਗ ਲਗਾਉਣ ਦੇ ਦੋਸ਼ ਵਿੱਚ ਦੋ 17 ਸਾਲ ਦੇ ਨਾਬਾਲਗਾਂ ਨੂੰ 10-10 ਸਾਲ ਦੀ ਕੈਦ ਦੀ ਸਜ਼ਾ ਸੁਣਾਈ ਗਈ। ਇਸ ਘਟਨਾ ਵਿੱਚ ਰੈਸਟੋਰੈਂਟ ਵਿੱਚ ਮੌਜੂਦ ਖਾਣਾ ਖਾ ਰਹੇ ਲੋਕ ਗੰਭੀਰ ਰੂਪ ਵਿੱਚ ਜ਼ਖ਼ਮੀ ਗਏ ਸਨ। ਲੰਡਨ ਦੀ ਓਲਡ ਬੇਲੀ ਅਦਾਲਤ ਨੂੰ ਦੱਸਿਆ ਗਿਆ ਸੀ ਕਿ ਅਗਸਤ 2025 ਵਿੱਚ, ਦੋ ਨਾਬਾਲਗ ਗੈਂਟਸ ਹਿੱਲ ਵਿੱਚ ‘‘ਇੰਡੀਅਨ ਅਰੋਮਾ’’ ਨਾਮੀ ਰੈਸਟੋਰੈਂਟ ਵਿੱਚ ਚਾਕੂਆਂ ਨਾਲ ਦਾਖਲ ਹੋਏ ਅਤੇ ਉਨ੍ਹਾਂ ਨੇ ਦਰਵਾਜ਼ੇ ਬੰਦ ਕਰ ਦਿੱਤੇ, ਜਦੋਂ ਕਿ ਇੱਕ ਤੀਜੇ ਵਿਅਕਤੀ ਨੇ ਰੈਸਟੋਰੈਂਟ ਅੰਦਰ ਤੇਲ ਛਿੜਕ ਕੇ ਅੱਗ ਲਗਾ ਦਿੱਤੀ।

ਸਜ਼ਾ ਸੁਣਾਉਦੇ ਹੋਏ ਜੱਜ ਮਾਈਕਲ ਗ੍ਰੀਵ ਨੇ ਦੋਵਾਂ ਨਾਬਾਲਗਾਂ ਨੂੰ ਕਿਹਾ, ‘‘ਤੁਸੀਂ ਦੋਵੇਂ ਪੂਰੀ ਤਰ੍ਹਾਂ ਜਾਣਦੇ ਸੀ ਕਿ ਨਤੀਜੇ ਗੰਭੀਰ ਹੋ ਸਕਦੇ ਸਨ, ਜਿਸ ਵਿੱਚ ਅਜਨਬੀਆਂ ਦੀ ਮੌਤ ਵੀ ਸ਼ਾਮਿਲ ਹੈ।’’ ਪੀੜ੍ਹਤਾਂ ਦਾ ਹਵਾਲਾ ਦਿੰਦੇ ਹੋਏ, ਜਸਟਿਸ ਗ੍ਰੀਵ ਨੇ ਕਿਹਾ ਕਿ ਉਨ੍ਹਾਂ ਨੂੰ ‘‘ਬਹੁਤ ਦਰਦ ਅਤੇ ਸੱਟਾਂ ਲੱਗੀਆਂ ਜਿਨ੍ਹਾਂ ਨੇ ਉਨ੍ਹਾਂ ਦੀ ਜ਼ਿੰਦਗੀ ਬਦਲ ਦਿੱਤੀ। ਸਥਿਤੀ ਬਹੁਤ ਮਾੜੀ ਹੋ ਸਕਦੀ ਸੀ।’’ ਦੋਵਾਂ ਦੋਸ਼ੀਆਂ ਦੇ ਨਾਮ ਦਾ ਖੁਲਾਸਾ ਨਹੀਂ ਕੀਤਾ ਗਿਆ ਕਿਉਕਿ ਉਹ ਨਾਬਾਲਗ ਹਨ। ਅਦਾਲਤ ਨੇ ਦੋਵਾਂ ਨੂੰ 10 ਸਾਲ ਦੀ ਕੈਦ ਦੀ ਸਜ਼ਾ ਸੁਣਾਈ ਅਤੇ ਫਿਰ ਸਖ਼ਤ ਨਿਗਰਾਨੀ ਹੇਠ ਰੱਖਣ ਦੀ ਤਿੰਨ ਸਾਲ ਦੀ ਸਜ਼ਾ ਸੁਣਾਈ। ਅਦਾਲਤ ਨੂੰ ਦੱਸਿਆ ਗਿਆ ਕਿ ਦੋਵੇਂ ਨਾਬਾਲਗ ਇੱਕ ਤੀਜੇ ਵਿਅਕੀਤ ਨਾਲ ਰੈਸਟੋਰੈਂਟ ਵਿੱਚ ਦਾਖ਼ਲ ਹੋਏ ਸਨ। ਅਦਾਲਤ ਨੂੰ ਦੱਸਿਆ ਗਿਆ ਕਿ ਉਸ ਸਮੇਂ ਅੱਠ ਗਾਹਕ ਉੱਥੇ ਖਾਣਾ ਖਾ ਰਹੇ ਸਨ। ਤੀਜਾ ਵਿਅਕਤੀ ਰੈਸਟੋਰੈਂਟ ਦੇ ਪਿਛਲੇ ਪਾਸੇ ਗਿਆ ਅਤੇ ਫ਼ਰਸ਼ ਅਤੇ ਮੇਜ਼ਾਂ ’ਤੇ ਪੈਟਰੋਲ ਪਾ ਦਿੱਤਾ। ਅੱਗ ਲਗਾਉਣ ਤੋਂ ਬਾਅਦ, ਤਿੰਨੋਂ ਇੱਕ ਚੋਰੀ ਦੀ ਕਾਰ ਵਿੱਚ ਭੱਜ ਗਏ।