ਇਟਲੀ ਪੁਲਿਸ ਨੇ ਨਸ਼ੇ ਸਮੇਤ ਚਾਰ ਭਾਰਤੀ ਗ੍ਰਿਫ਼ਤਾਰ ਕੀਤੇ

ਡੋਡੇ ਅਤੇ ਨਸ਼ੀਲਾ ਪਦਾਰਥ ਇਕ ਕੁਇੰਟਲ ਤੋਂ ਵੱਧ ਬਰਾਮਦ

ਇਟਲੀ – ਇੱਥੋਂ ਦੀ ਪੁਲਿਸ ਨੇ ਦੇਸ਼ ਵਿੱਚੋਂ ਨਸ਼ਿਆਂ ਦੇ ਕਾਰੋਬਾਰ ਅਤੇ ਕਾਰੋਬਾਰੀਆਂ ਨੂੰ ਨੱਥ ਪਾਉਣ ਲਈ ਬਹੁਤ ਹੀ ਮੁਸ਼ਤੈਦੀ ਨਾਲ ਦੇਸ਼ ਦਾ ਚੱਪਾ-ਚੱਪਾ ਨਾਪ ਰਹੀ ਹੈ। ਇਸ ਮੁਹਿੰਮ ਤਹਿਤ ਹੀ ਰਾਜਧਾਨੀ ਰੋਮ ਅਧੀਨ ਆਉਦੇ ਇਲਾਕਾ ਅਰਦਿਆ ਦੇ ਤੋਰ ਸਨ ਲੋਰੈਂਸੋ ਵਿਖੇ ਇਟਲੀ ਪੁਲਿਸ ਨੂੰ ਇੱਕ ਵਿਸ਼ੇਸ਼ ਗਸ਼ਤ ਦੌਰਾਨ ਸੜਕ ਦੇ ਕਿਨਾਰੋ ਦੋ ਵੈਨਾਂ ਸ਼ੱਕੀ ਹਾਲਤ ਵਿੱਚ ਖੜ੍ਹੀਆਂ ਮਿਲੀਆਂ, ਜਿਨ੍ਹਾਂ ਕੋਲ ਚਾਰ ਵਿਅਕਤੀ ਖੜ੍ਹੇ ਸਨ।

ਜਦੋਂ ਪੁਲਿਸ ਨੇ ਇਨ੍ਹਾਂ ਵੈਨਾਂ ਕੋਲ ਗੱਡੀਆਂ ਖੜ੍ਹੀਆਂ ਕਰਕੇ ਚੈੱਕ ਕਰਨ ਦੀ ਕਾਰਵਾਈ ਸ਼ੁਰੂ ਕੀਤੀ ਤਾਂ ਉੱਥੇ ਖੜ੍ਹੇ ਚਾਰ ਵਿਅਕਤੀ ਹੌਲੀ-ਹੌਲੀ ਪੈਦਲ ਹੀ ਖਿਮਕਣ ਲੱਗੇ। ਪਰ ਮੁਸ਼ਤੈਦ ਪੁਲਿਸ ਨੇ ਚਾਰ ਨੌਜਵਾਨਾਂ ਨੂੰ ਮੌਕੇ ’ਤੇ ਹੀ ਦਬੋਚ ਲਿਆ, ਜਿਨ੍ਹਾਂ ਦੀ ਉਮਰ 22 ਤੋਂ 40 ਸਾਲ ਦੇ ਵਿਚਕਾਰ ਦੱਸੀ ਜਾ ਰਹੀ ਹੈ।
ਜਦੋਂ ਪੁਲਿਸ ਨੇ ਵੈਨਾਂ ਦੀ ਤਲਾਸ਼ੀ ਲਈ ਤਾਂ ਇਨ੍ਹਾਂ ਵੈਨਾਂ ਵਿੱਚੋਂ 1 ਕੁਇੰਟਲ ਤੋਂ ਵੱਧ ਡੋਡੇ ਪੋਸਤ ਨਸ਼ੀਲਾ ਪਦਾਰਥ ਬਰਾਮਦ ਹੋਇਆ, ਜੋ ਕਿ 1,018 ਲਿਫ਼ਾਫ਼ਿਆਂ ਵਿੱਚ ਭਰਿਆ ਹੋਇਆ ਸੀ। ਪੁਲਿਸ ਨੂੰ ਸ਼ੱਕ ਹੈ ਕਿ ਇਹ ਨਸ਼ੀਲਾ ਪਦਾਰਥ ਇਲਾਕੇ ਦੇ ਕਾਲੇ ਬਾਜ਼ਾਰ ਵਿੱਚ ਵੰਡਿਆ ਜਾਣਾ ਸੀ, ਪਰ ਪੁਲਿਸ ਦੀ ਮੁਸ਼ਤੈਦੀ ਕਾਰਨ ਅਜਿਹਾ ਨਾ ਹੋ ਸਕਿਆ। ਪੁਲਿਸ ਨੇ ਨਸ਼ੀਲੇ ਪਦਾਰਥ ਸਮੇਤ ਦੋਵੇਂ ਵੈਨਾਂ ਜ਼ਬਤ ਕਰ ਲਈਆਂ ਹਨ ਅਤੇ ਫੜ੍ਹੇ ਗਏ ਚਾਰ ਭਾਰਤੀ ਮੁਲਜ਼ਮਾਂ ਵਿਰੁੱਧ ਮਾਮਲੇ ਦੀ ਡੂੰਘਾਈ ਨਾਲ ਜਾਂਚ ਸ਼ੁਰੂ ਕਰ ਦਿੱਤੀ ਹੈ ਤਾਂ ਜੋ ਇਸ ਕਾਰੋਬਾਰ ਦੇ ਮੁਖੀਆਂ ਨੂੰ ਵੀ ਫੜ੍ਹਿਆ ਜਾ ਸਕੇ।

ਇਸ ਘਟਨਾ ਨੇ ਇੱਕ ਵਾਰ ਫਿਰ ਇਟਲੀ ਵਿੱਚ ਰਹਿਣ ਵਾਲੇ ਭਾਰਤੀ ਭਾਈਚਾਰੇ ਨੂੰ ਸ਼ਰਮਸਾਰ ਕੀਤਾ ਹੈ ਜਿਸ ਕਾਰਨ ਸਥਾਨਕ ਇਟਾਲੀਅਨ ਲੋਕਾਂ ਦਾ ਰਵੱਈਆ ਕਾਫ਼ੀ ਸਖ਼ਤ ਦੇਖਿਆ ਜਾ ਰਿਹਾ ਹੈ। ਜ਼ਿਕਰਯੋਗ ਹੈ ਕਿ ਕੁਝ ਸਮਾਂ ਪਹਿਲਾਂ ਵੀ ਅਪਰੀਲੀਆ ਸ਼ਹਿਰ ਵਿੱਚ ਇੱਕ ਭਾਰਤੀ ਕੋਲੋਂ 50 ਕਿਲੋਗ੍ਰਾਮ ਤੋਂ ਵੱਧ ਡੋਡੇ ਪੋਸਤ ਅਤੇ ਨਕਦੀ ਫੜ੍ਹੀ ਗਈ ਸੀ। ਇਟਾਲੀਅਨ ਲੋਕ ਅਜਿਹੀਆਂ ਘਟਨਾਵਾਂ ਕਾਰਨ ਹੈਰਾਨ ਹਨ ਕਿ ਪ੍ਰਵਾਸੀ ਭਾਰਤੀ ਇੱਥੇ ਕੰਮ ਕਰਨ ਆਉਦੇ ਹਨ ਜਾਂ ਨਸ਼ਿਆਂ ਦਾ ਕਾਰੋਬਾਰ ਕਰਨ। ਇੱਥੇ ਜ਼ਿਕਰਯੋਗ ਹੈ ਕਿ ਭਾਰਤ ਵਿੱਚ ਨਸ਼ੇ ਕਰਨ ਵਾਲੇ ਲੋਕਾਂ ਨੂੰ ਇਟਲੀ ਵਿੱਚ ਵੀ ਨਸ਼ਾ ਉਪਲੱਬਧ ਕਰਵਾਉਣ ਲਈ ਕਾਰੋਬਾਰ ਜ਼ੋਰਾਂ ’ਤੇ ਹੈ।