ਭਾਰਤੀ ਭਾਈਚਾਰੇ ਚ ਸੋਗ ਦੀ ਲਹਿਰ
ਵੱਖ ਵੱਖ ਸਮਾਜ ਸੇਵੀ, ਧਾਰਮਿਕ, ਰਾਜਨੀਤਿਕ ਅਤੇ ਕੌਂਸਲਰਾਂ ਵੱਲੋਂ ਡੂੰਘੇ ਦੁੱਖ ਦਾ ਪ੍ਰਗਟਾਵਾ
ਲੈਸਟਰ (ਸੁਖਜਿੰਦਰ ਸਿੰਘ ਢੱਡੇ) – ਲੈਸਟਰ ਸ਼ਹਿਰ ਦੀ ਜਨ ਸੇਵਾ ਨਾਲ ਜੁੜੀ ਮਸ਼ਹੂਰ ਸਖ਼ਸੀਅਤ, ਤੇ ਲੰਮੇ ਅਰਸੇ ਤੋਂ ਸਿਟੀ ਕੌਂਸਲ ਲੈਸਟਰ ਦੀ ਕੌਂਸਲਰ ਚਲੀ ਆ ਰਹੀ, ਲੈਸਟਰ ਸਿਟੀ ਕੌਂਸਲ ਦੀ ਮੌਜੂਦਾ ਅਸਿਸਟੈਂਟ ਮੇਅਰ ਅਤੇ ਬਰਤਾਨੀਆ ਦੀ ਪਹਿਲੀ ਏਸ਼ੀਅਨ ਮਹਿਲਾ ਲਾਰਡ ਮੇਅਰ ਰਹਿ ਚੁੱਕੀ ਮੰਜੂਲਾ ਸੂਦ ਦੇ ਦਿਹਾਂਤ ਨਾਲ ਸਮਾਜਿਕ, ਧਾਰਮਿਕ ਤੇ ਸਿਆਸੀ ਹਲਕਿਆਂ ਵਿੱਚ ਡੂੰਘਾ ਸੋਗ ਛਾ ਗਿਆ ਹੈ। 80 ਸਾਲ ਦੀ ਉਮਰ ਵਿੱਚ ਉਹ ਸੰਸਾਰ ਤੋਂ ਵਿਦਾ ਹੋ ਗਈ। ਉਹ ਲੁਧਿਆਣਾ ਜ਼ਿਲ੍ਹੇ ਨਾਲ ਸਬੰਧਿਤ ਸਨ। ਅਤੇ ਪਿਛਲੇ ਲੰਮੇ ਅਰਸੇ ਤੋਂ ਆਪਣੇ ਪਰਿਵਾਰ ਸਮੇਤ ਇੰਗਲੈਂਡ ਦੇ ਸ਼ਹਿਰ ਲੈਸਟਰ ਵਿਖੇ ਰਹੇ ਸਨ। ਬੀਤੇ ਦਿਨ ਉਨ੍ਹਾਂ ਦਾ ਦਿਲ ਦਾ ਦੌਰਾ ਪੈਣ ਅਚਾਨਕ ਦਿਹਾਂਤ ਹੋ ਗਿਆ।ਉਨ੍ਹਾਂ ਦੇ ਚਲੇ ਜਾਣ ਨੂੰ ਲੈ ਕੇ ਲੈਸਟਰ ਦਾ ਏਸ਼ੀਅਨ ਭਾਈਚਾਰਾ ਹੀ ਨਹੀਂ, ਸਗੋਂ ਵੱਖ-ਵੱਖ ਵਰਗਾਂ ਦੇ ਲੋਕ ਵੀ ਆਪਣੇ ਆਪ ਨੂੰ ਅਨਾਥਾ ਮਹਿਸੂਸ ਕਰ ਰਹੇ ਹਨ, ਕਿਉਂਕਿ ਮੰਜੂਲਾ ਸੂਦ ਨੂੰ ਲੋਕ “ਸਮਾਜ ਦੀ ਮਾਂ ਵਰਗੀ” ਅਤੇ “ਹਰ ਦੁੱਖੀ ਦਾ ਸਹਾਰਾ” ਵਜੋਂ ਜਾਣੇ ਜਾਂਦੇ ਰਹੇ ਹਨ।
ਪ੍ਰਾਪਤ ਜਾਣਕਾਰੀ ਅਨੁਸਾਰ ਮੰਜੂਲਾ ਸੂਦ ਨੇ ਆਪਣੀ ਜ਼ਿੰਦਗੀ ਦੇ ਲੰਮੇ ਵਰ੍ਹੇ ਲੋਕ ਭਲਾਈ, ਸਮਾਜਕ ਏਕਤਾ ਅਤੇ ਸਿਟੀ ਕੌਂਸਲ ਦੇ ਪ੍ਰਬੰਧ ਨਾਲ ਸੰਬੰਧਿਤ ਕੰਮਾਂ ਨੂੰ ਸਮਰਪਿਤ ਕਰ ਦਿੱਤੇ। ਉਹ ਸਿਟੀ ਕੌਂਸਲ ਵਿੱਚ ਰਹਿੰਦਿਆਂ ਹਮੇਸ਼ਾ ਲੋਕਾਂ ਦੇ ਰੋਜ਼ਮਰ੍ਹਾ ਮਸਲਿਆਂ—ਘਰਾਂ ਦੀਆਂ ਸਮੱਸਿਆਵਾਂ, ਬਜ਼ੁਰਗਾਂ ਦੀ ਦੇਖਭਾਲ, ਨੌਜਵਾਨਾਂ ਦੇ ਮੌਕੇ, ਔਰਤਾਂ ਦੀ ਸੁਰੱਖਿਆ ਅਤੇ ਭਾਈਚਾਰਿਆਂ ਵਿਚਕਾਰ ਸਾਂਝ-ਸਹਿਯੋਗ—ਲਈ ਸਰਗਰਮ ਰਹੀ। ਉਨ੍ਹਾਂ ਦਾ ਸਿੱਧਾ ਸੁਭਾਅ, ਗੱਲ ਸੁਣਨ ਦੀ ਆਦਤ ਅਤੇ ਕੰਮ ਕਰਵਾ ਦੇਣ ਵਾਲਾ ਢੰਗ ਉਨ੍ਹਾਂ ਦੀ ਵੱਖਰੀ ਪਛਾਣ ਬਣਿਆ ਰਿਹਾ।
ਮੰਜੂਲਾ ਸੂਦ ਨੇ ਜਨ ਸੇਵਾ ਦੇ ਰਾਹ ’ਤੇ ਤੁਰਦਿਆਂ ਇੱਕ ਵੱਡਾ ਮੀਲ ਪੱਥਰ ਉਸ ਵੇਲੇ ਛੂਹਿਆ ਜਦੋਂ ਉਹ ਬਰਤਾਨੀਆ ਦੀ ਪਹਿਲੀ ਏਸ਼ੀਅਨ ਮਹਿਲਾ ਲਾਰਡ ਮੇਅਰ ਬਣੀ। ਇਸ ਜ਼ਿੰਮੇਵਾਰੀ ਦੌਰਾਨ ਉਨ੍ਹਾਂ ਨੇ ਸ਼ਹਿਰ ਦੇ ਹਰ ਵਰਗ ਨਾਲ ਜੁੜ ਕੇ ਸਾਂਝ ਅਤੇ ਭਾਈਚਾਰਕ ਸੁਹਿਰਦਤਾ ਨੂੰ ਉਭਾਰਿਆ। ਉਨ੍ਹਾਂ ਦੀ ਅਗਵਾਈ ਨੂੰ ਏਸ਼ੀਅਨ ਭਾਈਚਾਰੇ ਲਈ ਇੱਜ਼ਤ, ਹੌਸਲੇ ਅਤੇ ਨਵੇਂ ਰਸਤੇ ਖੁੱਲ੍ਹਣ ਦੀ ਨਿਸ਼ਾਨੀ ਮੰਨਿਆ ਜਾਂਦਾ ਰਿਹਾ।
ਉਨ੍ਹਾਂ ਦੇ ਦਿਹਾਂਤ ਦੀ ਖ਼ਬਰ ਫੈਲਦਿਆਂ ਹੀ ਜਨਤਾ ਵੱਲੋਂ ਵੱਡੇ ਪੱਧਰ ’ਤੇ ਦੁੱਖ ਪ੍ਰਗਟ ਕੀਤਾ ਜਾ ਰਿਹਾ ਹੈ। ਕਈ ਲੋਕਾਂ ਨੇ ਕਿਹਾ ਕਿ ਮੰਜੂਲਾ ਸੂਦ ਕਦੇ ਕਿਸੇ ਦੀ ਗੱਲ ਟਾਲਦੀ ਨਹੀਂ ਸੀ; ਉਹ ਹਰ ਕਿਸੇ ਨੂੰ ਸੁਣਦੀ, ਸਮਝਦੀ ਅਤੇ ਸੰਭਵ ਹੋਵੇ ਤਾਂ ਤੁਰੰਤ ਹੱਲ ਕੱਢਣ ਲਈ ਦਫ਼ਤਰਾਂ ਤੱਕ ਦੌੜ-ਧੁੱਪ ਕਰਦੀ। ਉਨ੍ਹਾਂ ਦੇ ਸਹਿਯੋਗੀਆਂ ਅਨੁਸਾਰ ਉਹ ਸਿਰਫ਼ ਅਹੁਦੇ ਦੀ ਗੱਲ ਨਹੀਂ ਕਰਦੀ ਸੀ, ਸਗੋਂ ਲੋਕਾਂ ਦੇ ਦਰਦ ਨੂੰ ਆਪਣਾ ਦਰਦ ਸਮਝ ਕੇ ਕੰਮ ਕਰਦੀ ਸੀ। ਬਜ਼ੁਰਗਾਂ, ਪਰਵਾਸੀ ਪਰਿਵਾਰਾਂ ਅਤੇ ਲੋੜਵੰਦਾਂ ਲਈ ਉਨ੍ਹਾਂ ਦੇ ਕੀਤੇ ਕੰਮਾਂ ਨੂੰ ਲੋਕ ਅੱਜ ਵੀ ਕਦਰ ਨਾਲ ਯਾਦ ਕਰ ਰਹੇ ਹਨ।
ਸਮਾਜਿਕ ਅਗਵਾਨੀਆਂ ਦਾ ਕਹਿਣਾ ਹੈ ਕਿ ਮੰਜੂਲਾ ਸੂਦ ਨੇ ਮਹਿਲਾਵਾਂ ਨੂੰ ਅੱਗੇ ਆਉਣ ਲਈ ਹੌਸਲਾ ਦਿੱਤਾ ਅਤੇ ਸੇਵਾ ਨੂੰ ਇੱਜ਼ਤ ਦਾ ਰਾਹ ਬਣਾਇਆ। ਉਨ੍ਹਾਂ ਨੇ ਭਾਈਚਾਰਿਆਂ ਵਿਚਕਾਰ ਪਿਆਰ, ਸਹਿਣਸ਼ੀਲਤਾ ਅਤੇ ਇਕਤਾ ਦਾ ਸੁਨੇਹਾ ਦਿੰਦਿਆਂ ਕਈ ਸਮਾਗਮਾਂ ਅਤੇ ਮੁਹਿੰਮਾਂ ਵਿੱਚ ਸਰਗਰਮ ਭੂਮਿਕਾ ਨਿਭਾਈ। ਲੋਕਾਂ ਦਾ ਮੰਨਣਾ ਹੈ ਕਿ ਉਨ੍ਹਾਂ ਦੀ ਸਾਦਗੀ ਅਤੇ ਸੇਵਾ-ਭਾਵਨਾ ਹੀ ਉਨ੍ਹਾਂ ਦੀ ਸਭ ਤੋਂ ਵੱਡੀ ਪੂੰਜੀ ਸੀ।
ਇਸ ਦਰਮਿਆਨ ਉਨ੍ਹਾਂ ਦੀ ਯਾਦ ਵਿੱਚ ਵੱਖ-ਵੱਖ ਸੰਸਥਾਵਾਂ ਵੱਲੋਂ ਸ਼ਰਧਾਂਜਲੀ ਸਮਾਗਮ ਰੱਖਣ ਦੀਆਂ ਤਿਆਰੀਆਂ ਕੀਤੀਆਂ ਜਾ ਰਹੀਆਂ ਹਨ, ਤਾਂ ਜੋ ਉਨ੍ਹਾਂ ਦੀ ਜੀਵਨ-ਯਾਤਰਾ ਅਤੇ ਜਨ ਸੇਵਾ ਨੂੰ ਅਗਲੀਆਂ ਪੀੜ੍ਹੀਆਂ ਲਈ ਪ੍ਰੇਰਣਾ ਵਜੋਂ ਸੰਭਾਲਿਆ ਜਾ ਸਕੇ। ਲੈਸਟਰ ਦੇ ਲੋਕਾਂ ਦਾ ਕਹਿਣਾ ਹੈ ਕਿ ਮੰਜੂਲਾ ਸੂਦ ਦਾ ਨਾਮ ਸ਼ਹਿਰ ਦੀ ਜਨ ਸੇਵਾ ਦੇ ਇਤਿਹਾਸ ਵਿੱਚ ਹਮੇਸ਼ਾ ਸਨਮਾਨ ਨਾਲ ਲਿਆ ਜਾਂਦਾ ਰਹੇਗਾ। ਉਹਨਾਂ ਦੀ ਇਸ ਬੇਵਕਤ ਮੌਤ ਦੇ ਲੈਸਟਰ ਸਿਟੀ ਕੌਂਸਲ ਦੇ ਮੇਅਰ ਪੀਟਰ ਸੋਲਜਬਰੀ,ਸਾਬਕਾ ਡਿਪਟੀ ਮੇਅਰ ਪਿਆਰਾ ਸਿੰਘ ਕਲੇਰ,ਸਾਬਕਾ ਕੌਂਸਲਰ ਗੁਰਿੰਦਰ ਸਿੰਘ ਸੰਧੂ, ਸਾਬਕਾ ਲੌਡ ਮੇਅਰ ਦੀਪਕ ਬਜਾਜ,ਕੌਂਸਲਰ ਕੁਲਵਿੰਦਰ ਸਿੰਘ ਜੋਹਲ, ਗੁਰਦੁਆਰਾ ਸ੍ਰੀ ਗੁਰੂ ਤੇਗ ਬਹਾਦਰ ਸਾਹਿਬ ਦੇ ਸਾਬਕਾ ਪ੍ਰਧਾਨ ਤੇ ਤੀਰ ਗਰੁੱਪ ਦੇ ਮੁੱਖ ਬੁਲਾਰੇ ਰਾਜ ਮਨਵਿੰਦਰ ਸਿੰਘ ਰਾਜਾ ਕੰਗ, ਮੌਜੂਦਾ ਪ੍ਰਧਾਨ ਗੁਰਨਾਮ ਸਿੰਘ ਨਵਾਂ ਸ਼ਹਿਰ,ਅਕਾਲੀ ਆਗੂ ਮੁਖਤਿਆਰ ਸਿੰਘ ਝੰਡੇਰ ਸਮੇਤ ਵੱਖ-ਵੱਖ ਧਾਰਮਿਕ,ਸਿਆਸੀ ਅਤੇ ਸਮਾਜ ਸੇਵੀ ਆਗੂਆਂ ਨੇ ਡੂੰਘੇ ਦੁੱਖ ਦਾ ਪ੍ਰਗਟਾਵਾ ਕੀਤਾ।
Comments are closed, but trackbacks and pingbacks are open.